بوسٹن ۔4اکتوبر (اے پی پی):کینیڈا کا ایک چھوٹا طیارہ امریکا میں پرواز کے دوران لاپتہ ہو گیا۔ اے پی کے مطابق ایئرایمبولینس گلف سٹریم جی 100 طیارے میں کل 6 افراد سوار تھے جن میں سے 4 کا تعلق کینیڈا اور 2 کا برمودا سے تھا۔
رپورٹ کے مطابق امدادی کارروائیوں کے دوران سمندر میں اس علاقے کی نشان دہی کر لی گئی ہے جہاں ممکنہ طور پر طیارے کا ملبہ گرا ہو سکتا ہے۔
یہ طیارہ برمودا کے ایل ایف ویڈ انٹر نیشنل ایئر پورٹ سے امریکی شہر بوسٹن کے لیے روانہ ہو ا تھا تاہم دوران پرواز خراب موسم کے دوران اس کے نیوی گیشن سسٹم نے کام کر نا چھوڑ دیا جس کی اطلاع پائلٹ نے کنٹرول ٹاور کو دی۔
ابتدائی معلومات کے مطابق رابطہ منقطع ہونے کے وقت طیارہ 24 ہزار فٹ کی بلندی پر پرواز کر رہا تھا کہ اچانک گر کر 10 ہزار فٹ کی بلندی پر آگیا اور خرام موسم میں پھنس گیا۔ طیارے کے ممکنہ ملبے اور لاپتہ افراد کی تلاش کے لئے امدادی کارروائیاں جاری ہیں ۔
بشکریہ: اے پی پی (ایسوسی ایٹڈ پریس آف پاکستان)
