ملتان۔ 02 اکتوبر (اے پی پی):وفاقی تحقیقاتی ادارے (ایف آئی اے) ملتان زون نے افغان شہریوں کے غیر قانونی اندراج اور جعلی دستاویزات کے ذریعے پاکستانی شناخت حاصل کرنے کے خلاف کارروائی کرتے ہوئے مختلف یونین کونسلز کے تین سیکرٹریز کو گرفتار کر لیا ہے۔ترجمان ایف آئی اے کے مطابق ایف آئی اے کمپوزٹ سرکل ملتان نے ڈپٹی ڈائریکٹر احسن علی ہانی باجوہ کی زیرنگرانی کارروائی کرتے ہوئے یونین کونسلز کے سیکرٹریز کو گرفتار کرلیا ۔ گرفتار ملزمان کی شناخت ملک خورشید، محمد جعفر اور عبدالجبار کے نام سے ہوئی۔
ایف آئی اے حکام کے مطابق ملزمان کے خلاف ایف آئی اے اے سی سی ملتان کے مقدمہ نمبر 15/2026 کے تحت کارروائی کی گئی۔ ملزمان پر الزام ہے کہ انہوں نے افغان شہریوں کو سی آر ایم ایس نادرا ڈیٹا بیس میں غیر قانونی طور پر رجسٹر کیا اور انہیں برتھ سرٹیفکیٹس جاری کیے۔حکام کے مطابق مذکورہ برتھ سرٹیفکیٹس کی بنیاد پر افغان شہریوں نے مبینہ طور پر جعلی دستاویزات کے ذریعے پاکستانی شہریت حاصل کی۔ایف آئی اے نے کہا کہ گرفتار ملزمان سے مزید تفتیش جاری ہے جبکہ معاملے میں دیگر افراد کے ملوث ہونے سمیت مختلف پہلوؤں کی بھی تحقیقات کی جا رہی ہیں۔
بشکریہ: اے پی پی (ایسوسی ایٹڈ پریس آف پاکستان)
