بھکر۔ 02 اکتوبر (اے پی پی):ڈپٹی کمشنربھکر احسان علی جمالی کی ہدایات پر پنجاب فوڈ اتھارٹی بھکر کی جانب سے ضلع بھر میں خوراک کے معیار اور حفظانِ صحت کو یقینی بنانے کے لیے کارروائیوں کا سلسلہ جاری ہے۔ اس ضمن میں ماہ ستمبر کی جاری کردہ کارکردگی رپورٹ میں بتایا گیا کہ پنجاب فوڈ اتھارٹی کی فوڈ سیفٹی ٹیموں نے ضلع بھکر بھر میں خوراک کے معیار اور عوامی صحت کے تحفظ کے لیے بھرپور کارروائیاں کرتے ہوئے 1528 فوڈ بزنسز کا معائنہ کیا۔اس سلسلہ میں فوڈ سیفٹی قوانین کی خلاف ورزیوں پر528 کاروباری مراکز کو اصلاحی نوٹسز جاری کیے گئے جبکہ 151 کاروباری مراکز کو مجموعی طور پر 13 لاکھ روپے کے جرمانے عائد کیے گئے۔
فوڈ سیفٹی کی جانچ کے لیے 34 فوڈ سیمپلز حاصل کیے گئے جبکہ سنگین نوعیت کی خلاف ورزی پر ایک مقدمہ (FIR) بھی درج کروایا گیا۔ غیر محفوظ خوراک کی تیاری و فروخت اور قوانین کی خلاف ورزی پر 5 فوڈ بزنسز کے خلاف ایمرجنسی پروہیبیشن آرڈرزجاری کرتے ہوئے انہیں عارضی طور پر سیل کر دیا گیا۔ دودھ میں ملاوٹ اور غیر معیاری دودھ کی روک تھام کے لیے مختلف مقامات پر ناکہ بندی اور چیکنگ کے دوران 470 دودھ بردار گاڑیوں کا معائنہ کیا گیاجبکہ مجموعی طور پر 59,950 لیٹر دودھ چیک کیا گیا اور دودھ سے متعلق خلاف ورزیوں پر 38,500 روپے کے جرمانے عائد کیے گئے۔
ڈپٹی کمشنر احسان علی جمالی نے متعلقہ افسران کو ہدایت کی ہے کہ ضلع بھر میں خوراک کے معیار اور عوامی صحت کے تحفظ کے لیے فیلڈ چیکنگ مزید مؤثر بنائی جائے اور غیر معیاری و مضرِ صحت خوراک کی تیاری و فروخت میں ملوث عناصر کے خلاف قانون کے مطابق بلاامتیاز کارروائی کی جائے۔ پنجاب فوڈ اتھارٹی بھکر کے مطابق خوراک کے معیار اور عوام کی صحت پر کوئی سمجھوتہ نہیں کیا جائے گا اور فوڈ سیفٹی قوانین کی خلاف ورزی کرنے والے کاروباری مراکز کے خلاف کارروائیاں جاری رہیں گی۔\
بشکریہ: اے پی پی (ایسوسی ایٹڈ پریس آف پاکستان)
