پشاور۔ 02 اکتوبر (اے پی پی):وزیراعلیٰ خیبرپختونخوا محمد سہیل آفریدی نے ای فرد پورٹل اور ڈیجیٹل پبلک فیڈ بیک نظام کا اجرا کردیا۔ترجمان وزیر اعلیٰ ہائوس پشاور کے مطابق وزیر اعلیٰ خیبرپختونخوا نے تقریب سے خطاب کرتے ہوئے کہا کہ شہری اب ریونیو دفاتر کے بار بار چکر لگانے کی بجائے گھر بیٹھے یا قریبی مرکز سے فرد حاصل کرسکیں گے۔انہوں نے کہا کہ عوام کو ان کی دہلیز پر آسان، شفاف اور تیز خدمات کی فراہمی حکومت کی ترجیح ہے۔انہوں نے کہا کہ ڈیجیٹل اصلاحات سے زمین کے ریکارڈ سے متعلق خدمات میں رفتار اور شفافیت مزید بہتر ہوگی۔
اس موقع پر وزیر اعلیٰ خیبرپختونخوا کو متعلقہ حکام کی جا نب سے بریفنگ دی گئی ۔بریفنگ میں بتایا گیا کہ ای فرد پورٹل کے ذریعے شہریوں کو سادہ، محفوظ اور خودکار طریقے سے فرد کے حصول کی سہولت ہوگی۔ فرد کے اجرا کے لیے نادرا ای سہولت مراکز، آفیشل ویب سائٹ سیلف سروس پورٹل اور دستک ایپ کے تین چینلز دستیاب ہوں گے۔بریفنگمیں بتایا گیا کہ نادرا سے بائیومیٹرک تصدیق شدہ صارفین ہی ای فرد ڈائون لوڈ کرسکیں گے۔ فرد کی فیس ون لنک اور ایزی پیسہ کے ذریعے الیکٹرانک طور پر سرکاری خزانے میں جمع ہوگی۔
بریفننگ میں بتایا گیا کہ ادائیگی کے بعد فرد شہری کے اکائونٹ میں محفوظ رہے گی اور کسی بھی وقت دوبارہ ڈائون لوڈ کی جاسکے گی۔ بریفننگ کے مطابق فرد پر موجود کیو آر کوڈ کے ذریعے مرکزی اراضی ریکارڈ سے آن لائن تصدیق ممکن ہوگی۔ ڈیجیٹل پبلک فیڈ بیک نظام کے ذریعے ریونیو خدمات حاصل کرنے والے شہریوں سے ٹیلی فونک رابطہ کیا جائے گا۔ شہریوں کی رائے آواز کی صورت میں ریکارڈ کرکے نظام میں درج کی جائے گی۔
بریفنگ کے مطابق شہری اطمینان کو چار درجات میں ریکارڈ کیا جائے گا، غیر مطمئن شہریوں کی شکایات براہ راست ڈپٹی کمشنر کے ڈیش بورڈ پر ظاہر ہوں گی۔ فیڈ بیک کو اضلاع کی کارکردگی اور شہری اطمینان کی مسلسل نگرانی کے لیے استعمال کیا جائے گا۔ شہریوں کی رائے کو ڈپٹی کمشنرز کے ماہانہ اجلاسوں میں کارکردگی کے اہم اشاریے کے طور پر شامل کیا جائے گا۔ بہترین کارکردگی والے اضلاع کی حوصلہ افزائی جبکہ کمزور کارکردگی والے اضلاع سے جواب طلبی ہوگی۔
اس موقع پر وزیر اعلیٰ خیبرپختونخوا نے کہا کہ ڈیجیٹل فیڈ بیک کے ذریعے ریونیو خدمات میں تاخیر اور ناقص کارکردگی کی نشاندہی ممکن ہوگی۔انہوں نے کہا کہ ڈیجیٹل اصلاحات زمین سے متعلق شکایات میں کمی اور لینڈ ریکارڈ نظام پر عوامی اعتماد کی بحالی میں مددگار ہوں گی۔ انہوں نے ڈیجیٹل اصلاحات کے اجرا میں کردار ادا کرنے والے حکام کو خراج تحسین اور تعریفی اسناد سے نوازا۔وزیر اعلیٰ نے کہا کہ لینڈ ریکارڈ میں ڈیجیٹل اصلاحات وقت کی اہم ضرورت تھیں، عوام کو آسان اور شفاف خدمات کی فراہمی یقینی بنائیں گے۔
بشکریہ: اے پی پی (ایسوسی ایٹڈ پریس آف پاکستان)
