پشاور۔ 02 اکتوبر (اے پی پی):بینک آف خیبر نے اپنے ملازمین کے لئے پنکٹوبر 2026 کے تحت ایک ماہ پر محیط بریسٹ کینسر آگاہی مہم کا آغاز کیا۔بینک آ ف خیبر تر جمان کے مطابق مہم کا مقصد ابتدائی تشخیص کی اہمیت اجاگر کرنا اور بروقت طبی معائنہ و علاج کی حوصلہ افزائی کرنا ہے۔ مہم کا آغاز بینک کے ہیڈ آفس، بینک آف خیبر ٹاور، پشاور میں منعقدہ ایک تقریب کے دوران کیا گیا۔رواں سال مہم کا موضوع "Many Journeys, One Hope” ہے، جو اس بات کو اجاگر کرتا ہے کہ بریسٹ کینسر سے متاثرہ ہر فرد کا سفر مختلف ہوتا ہے، تاہم بیماری کی علامات کو بروقت پہچاننا اور فوری اقدامات کرنا انتہائی اہم ہے۔
افتتاحی تقریب میں انسٹی ٹیوٹ آف ریڈیوتھراپی اینڈ نیوکلیئر میڈیسن، پشاور کی کنسلٹنٹ ریڈی ایشن آنکولوجسٹ ڈاکٹر زینب جان نے آگاہی سیشن کے دوران ملازمین کو ابتدائی علامات کے بارے میں آگاہ کیا، جبکہ خیبر ٹیچنگ ہسپتال پشاور کی جنرل سرجری اور فیلو بریسٹ سرجن ڈاکٹر عبیر جہانزیب نے بریسٹ سیلف ایگزامی نیشن کے طریقہ کار پر روشنی ڈالی اور ملازمین کے سوالات کے جوابات دیے۔گروپ ہیڈ ہیومن ریسورسز، شعبان بٹ نے کہا کہ یہ سمجھنا ضروری ہے کہ بریسٹ کینسر کی وجوہات کیا ہیں، اس سے کیسے بچاؤ ممکن ہے اور بروقت علاج کس طرح زندگیوں کو بچانے میں مددگار ثابت ہو سکتا ہے۔ ایک ادارے کی حیثیت سے ہم اپنے ملازمین کے ساتھ کھڑے ہیں۔
انسانی سرمایہ اور انسانی فلاح و بہبود ہمارے تمام اقدامات کا مرکز ہیں، اور ہم اپنے ساتھیوں، بالخصوص خواتین جو ادارے کے لیے بے پناہ قدر رکھتی ہیں، کی معاونت جاری رکھیں گے۔قائم مقام مینجنگ ڈائریکٹر اورگروپ ہیڈ ریٹیل بینکنگ گل بہار خان نے کہا کہ بریسٹ کینسر پر خصوصی توجہ اس لیے ضروری ہے کہ یہ خواتین کو نسبتاً کم عمری میں بھی متاثر کر سکتا ہے۔ اگرچہ دیگر بیماریاں زیادہ جانیں لے سکتی ہیں، تاہم کم عمری میں بریسٹ کینسر کے اثرات اس بیماری کے بارے میں آگاہی کو خاص اہمیت دیتے ہیں۔ کینسر ایک جان لیوا بیماری ہے اور بروقت تشخیص زندگیوں کو بچا سکتی ہے۔پنکٹو رہے 2026 کے تحت بینک آف خیبر اپنے ملازمین کو آگاہ رہیں، معائنہ کروائیں، بریسٹ کینسر کے مریضوں کا ساتھ دیں اور امید پھیلائیں کے پیغام کے ذریعے آگاہی فراہم کر رہا ہے۔
اس اقدام کا مقصد آگاہی کو فروغ دینا، بیماری سے متعلق سماجی ہچکچاہٹ کو کم کرنا اور خواتین کو جسم میں کسی بھی غیر معمولی تبدیلی کی صورت میں بروقت طبی مشورہ لینے کی ترغیب دینا ہے، جبکہ یہ اقدام ملازمین کی فلاح و بہبود اور صحت مند و جامع کام کے ماحول کے لیے بینک آف خیبر کے عزم کو بھی اجاگر کرتا ہے۔ عالمی ادارۂ صحت (ڈبلیو ایچ او) کے ذیلی ادارے انٹرنیشنل ایجنسی فار ریسرچ آن کینسر (IARC) کے مطابق، پاکستان میں 2022 کے دوران بریسٹ کینسر کے اندازاً 30,682 نئے کیسز اور 15,552 اموات ریکارڈ کی گئیں، جو اس بیماری سے متعلق آگاہی اور بروقت تشخیص کی اہمیت کو اجاگر کرتی ہیں۔
بشکریہ: اے پی پی (ایسوسی ایٹڈ پریس آف پاکستان)
