اسلام آباد۔2اکتوبر (اے پی پی):اسلام آباد کی ضلعی انتظامیہ نے پلاسٹک بیگز کے خلاف کریک ڈائون کرتے ہوئے مختلف علاقوں سے مجموعی طور پر 263 کلو گرام پلاسٹک بیگز قبضے میں لے کر 81 افراد کو حوالات منتقل اور متعدد دکانوں کو سیل کر دیا ۔ ترجمان ضلعی انتظامیہ کے مطابق کارروائیاں ڈی سی اسلام آباد کی ہدایت پر تمام سب ڈویژنز میں کی گئیں ۔ تفصیلات کے مطابق اےاسسٹنٹ کمشنر آئی نائن نے 33 کلو پلاسٹک بیگز قبضے میں لیے اور 23 افراد کو گرفتار اور 2 دکانیں سیل کیں۔
اے سی نیلور نے کھنہ و شہزاد ٹائون میں کارروائیوں کے دوران 15 افراد کو گرفتار اور 20 کلو پلاسٹک بیگز برآمد کرتے ہوئے دونوں دکانوں کو سیل کر دیا۔ اے سی رورل نے ہمک و لوہی بیر میں کارروائی کرتے ہوئے 11 افراد گرفتار کیے 30 کلو بیگز برآمد کیے۔اے سی سٹی کی کارروائیوں میں 18 گرفتاریاں اور 10 کلو بیگز قبضے میں لیے گئے۔ اے سی پوٹھوہار نے 4 گرفتاریاں 140 کلو گرام پلاسٹک بیگز قبضے میں لیے۔
اے سی پوٹھوہار کی جانب سے گزشتہ ہفتہ کارروائیوں میں بھی 200 کلو گرام پلاسٹک بیگز کو مارکیٹ سے ہٹایا گیا تھا۔ ایک اور کارروائی کے دوران اے سی سیکرٹریٹ نے 10 افراد گرفتار، دو دکانیں سیل اور 30 کلو بیگز برآمد کیے ۔ انتظامیہ کا کہنا ہے کہ ڈی سی اسلام آباد کی جانب سے پلاسٹک بیگز کے خلاف زیرو ٹالرینس پالیسی کا اعلان کیا گیا ہے ۔ ڈی سی اسلام آباد نے تمام اسسٹنٹ کمشنرز کو ہدایت جاری کی ہے کہ وہ روزانہ کی بنیاد پر پلاسٹک بیگز کے خلاف رپورٹ پیش کریں۔
بشکریہ: اے پی پی (ایسوسی ایٹڈ پریس آف پاکستان)
