اسلام آباد۔2اکتوبر (اے پی پی):20ویں ایشین گیمز آئچی ناگویا 2026 میں پاکستان نے سکواش مینز ٹیم ایونٹ میں شاندار کارکردگی کا مظاہرہ کرتے ہوئے چاندی کا تمغہ اپنے نام کر لیا۔گولڈ میڈل کے لئے کھیلے گئے فائنل میں پاکستان کو ملائیشیا کے ہاتھوں 0-2 سے شکست کا سامنا کرنا پڑا۔فائنل کے پہلے مقابلے میں ملائیشیا کے امیشین راج چندرن نے پاکستان کے ناصر اقبال کو 3-1 سے شکست دی۔ امیشین راج نے 8-11 سے پہلا گیم ہارنے کے بعد زبردست کم بیک کیا اور اگلے تین گیمز 11-3، 11-6، 11-4 سے جیت لیے۔
یہ میچ 41 منٹ تک جاری رہا۔دوسرے سنسنی خیز مقابلے میں ملائیشیا کے ایان یو نگ نے پاکستان کے نور زمان کو 5 گیمز کے سخت مقابلے کے بعد 3-2 سے ہرایا۔ نور زمان نے 2-1 کی برتری حاصل کی تھی مگر حریف کھلاڑی نے 11-4 اور 11-5 سے آخری دو گیمز جیت کر مقابلہ اپنے نام کر لیا۔ یہ میچ 53 منٹ جاری رہا۔
ایشین گیمز 2026 میں پاکستان نے سکواش میں مجموعی طور پر مینز انفرادی ایونٹ میں 2 کانسی کے تمغے جبکہ مینز ٹیم ایونٹ میں ایک چاندی کا تمغہ حاصل کیا۔ پاکستان نے ایشین گیمز سکواش مقابلوں میں مجموعی طور پر 3 تمغے حاصل کئے۔ قوم کی جانب سے اسکواش ٹیم کو شاندار کامیابی پر مبارکباد۔
بشکریہ: اے پی پی (ایسوسی ایٹڈ پریس آف پاکستان)
