کوئٹہ۔ 03 اکتوبر (اے پی پی):پاکستان پیپلز پارٹی کے رکن قومی اسمبلی نوابزادہ جمال خان رئیسانی نے ایوب اسٹیڈیم کوئٹہ میں بلوچستان اسٹوڈنٹس اولمپک ایسوسی ایشن کے زیرِ اہتمام منعقدہ طالبات کے بیڈمنٹن ٹورنامنٹ کی اختتامی تقریب میں بطور مہمانِ خصوصی شرکت کی ۔ نوابزادہ جمال خان رئیسانی کی آمد پر بلوچستان اسٹوڈنٹس اولمپک ایسوسی ایشن کی صدر مس اختر، جنرل سیکریٹری عاصم اسحاق خان، منتظمین اور کھلاڑیوں نے ان کا پرتپاک استقبال کیا۔ تقریب میں بلوچستان بھر سے طلبہ اور نوجوان کھلاڑیوں نے شرکت کی۔
اختتامی تقریب کے موقع پر نوابزادہ جمال خان رئیسانی نے ٹورنامنٹ میں نمایاں کارکردگی کا مظاہرہ کرنے والی ونر ٹیم کو شیلڈ اور کپ پیش کیا۔اس موقع پر خطاب کرتے ہوئے نوابزادہ جمال خان رئیسانی نے کہا کہ طلبہ اور نوجوانوں کی شخصیت سازی میں کھیلوں کا اہم کردار ہے، کھیل نوجوانوں میں نظم و ضبط، خود اعتمادی، مثبت سوچ، ٹیم ورک اور آگے بڑھنے کا جذبہ پیدا کرتے ہیں، بلوچستان کے باصلاحیت طلبہ اور نوجوان کھلاڑیوں کو اپنی صلاحیتوں کے اظہار کے لیے بہتر مواقع اور مناسب پلیٹ فارم فراہم کرنا وقت کی اہم ضرورت ہے۔
انہوں نے کہا کہ کھیلوں کے فروغ کے ذریعے نوجوان نسل کو مثبت اور صحت مند سرگرمیوں کی جانب راغب کیا جاسکتا ہے جبکہ بلوچستان کے نوجوان کھلاڑی مختلف کھیلوں میں اپنی صلاحیتوں کا لوہا منوانے کی بھرپور صلاحیت رکھتے ہیں۔ نوابزادہ جمال خان رئیسانی نے بیڈمنٹن ٹورنامنٹ کے کامیاب انعقاد پر بلوچستان اسٹوڈنٹس اولمپک ایسوسی ایشن کی قیادت، منتظمین اور تمام شریک کھلاڑیوں کو مبارکباد دیتے ہوئے کہا کہ نوجوان کھلاڑیوں کی حوصلہ افزائی اور کھیلوں کے فروغ کے لیے ہر ممکن تعاون کا سلسلہ جاری رکھا جائے گا۔
بشکریہ: اے پی پی (ایسوسی ایٹڈ پریس آف پاکستان)
