کوئٹہ۔ 04 اکتوبر (اے پی پی):پاکستان پیپلز پارٹی کے رکن قومی اسمبلی نوابزادہ جمال خان رئیسانی نے کہا ہے کہ بلوچستان کی پائیدار ترقی کے لیے سیاسی اختلافات سے بالاتر ہو کر عوامی مسائل پر توجہ دینا وقت کی اہم ضرورت ہے۔ کانک مستونگ سمیت مختلف علاقوں کے ترقیاتی مسائل کو سنجیدگی سے دیکھا جائے گا اور عوامی ضروریات کے مطابق عملی اقدامات کے لیے متعلقہ فورمز پر آواز مؤثر انداز میں اٹھائی جائے گی۔
ان خیالات کا اظہار انھوں نے اپنی رہائش سراوان ہاؤس کوئٹہ میں استاد عبدالکریم رئیسانی، ڈاکٹر محمد اقبال رئیسانی اور ثناء اللہ رئیسانی سے ملاقات کے موقع پر گفتگو کرتے ہوئے کیا۔ملاقات کے دوران مجموعی سیاسی صورتحال، کانک کے علاقے میں ترقیاتی امور اور عوام کو درپیش مسائل سمیت علاقے کی امن و امان کی صورتحال پر تفصیلی تبادلہ خیال کیا گیا۔
شرکا نے علاقے میں ترقیاتی عمل کو مزید مؤثر بنانے، بنیادی مسائل کے حل اور عوام کو درپیش مشکلات کے ازالے کے لیے مختلف تجاویز بھی پیش کیں۔رکن قومی اسمبلی نوابزادہ جمال خان رئیسانی نے کہا کہ عوامی خدمت کسی ایک علاقے یا سیاسی وابستگی تک محدود نہیں، بلکہ بلوچستان کے ہر شہری کے بنیادی حقوق اور مسائل کے حل کے لیے کردار ادا کرنا ہماری ذمہ داری ہے۔ امن و امان کے حوالے سے بھی مؤثر اقدامات اور عوام کے تحفظ کو اولین ترجیح حاصل ہونی چاہیے۔
اس موقع پر باہمی سیاسی و سماجی امور پر بھی گفتگو ہوئی، جبکہ نوابزادہ میر جمال خان رئیسانی نے شرکا کی جانب سے پیش کیے گئے مسائل اور تجاویز کو غور سے سنتے ہوئے ان کے حل کے لیے ہر ممکن تعاون اور عملی کردار ادا کرنے کی یقین دہانی کرائی۔
بشکریہ: اے پی پی (ایسوسی ایٹڈ پریس آف پاکستان)
