اسلام آباد۔4اکتوبر (اے پی پی):وزیراعظم کے قومی پروگرام برائے ہیپاٹائٹس سی کے خاتمے کے تحت ڈسٹرکٹ ہیلتھ آفس اسلام آباد نے وفاقی دارالحکومت کے مختلف سرکاری مراکز صحت میں مفت ہیپاٹائٹس سی سکریننگ، تشخیص اور علاج کی سہولیات کو مزید وسعت دے دی ہے۔سرکاری ذرائع کے مطابق رورل ہیلتھ سینٹرز ترلائی، بھارہ کہو اور سہالہ کمیونٹی ہیلتھ سینٹرز روات اور شاہ اللہ دتہ جبکہ بنیادی مراکز صحت سوہان اور گولڑہ شریف میں مفت ہیپاٹائٹس سی کی سکریننگ، تشخیص اور علاج کی سہولیات دستیاب ہیں۔
اس اقدام کا مقصد ہیپاٹائٹس سی کی بروقت تشخیص اور فوری علاج کو یقینی بنانا اور بالخصوص بنیادی مراکز صحت کے ذریعے شہریوں کو ضروری طبی سہولیات تک بہتر رسائی فراہم کرنا ہے۔ڈی ایچ او کے مطابق اسلام آباد کے مختلف سرکاری مراکز صحت میں مفت طبی مشاورت، سکریننگ اورہیپاٹائٹس سی سے متعلق دستیاب طبی سہولیات بھی فراہم کی جا رہی ہیں۔صحت حکام نے کہا کہ ہیپاٹائٹس سی قابلِ پیشگیری، تشخیص اور علاج کی بیماری ہے، جبکہ بروقت اسکریننگ اورمناسب علاج سے سنگین طبی پیچیدگیوں سے بچاؤ ممکن ہے۔
شہریوں کو مشورہ دیا گیا ہے کہ وہ سکریننگ اور طبی مشاورت کے لیے اپنے قریبی سرکاری مرکز صحت سے رجوع کریں اوربیماری کا شبہ ہونے یا ممکنہ طور پر وائرس سے متاثر ہونے کی صورت میں بروقت طبی مشورہ حاصل کریں۔ڈی ایچ او نے شہریوں پر زور دیا کہ وہ احتیاطی تدابیر اختیار کریں اور ہیپاٹائٹس سی کے پھیلاؤ میں کمی لانے کی کوششوں میں محکمہ صحت کے عملے سے تعاون کریں۔یہ اقدام ملک بھر میں ہیپاٹائٹس سی کی اسکریننگ اور علاج تک رسائی بڑھانے اور بیماری کے خاتمے کے لیے جاری وسیع تر قومی کوششوں کا حصہ ہے۔
بشکریہ: اے پی پی (ایسوسی ایٹڈ پریس آف پاکستان)
