اسلام آباد۔3اکتوبر (اے پی پی):پی ٹی آئی سے مذاکرات کرنے والی حکومتی مذاکراتی ٹیم کی رکن نائب صدر پیپلز پارٹی سینیٹر شیری رحمان نے کہا ہے کہ ہم موجودہ مسائل جمہوری انداز میں حل کرنے کی کوشش کر رہے ہیں۔ ہفتہ کو یہاں میڈیا سے گفتگو کرتے ہوئے سینیٹر شیری رحمان نے کہا کہ چیئرمین بلاول بھٹو نے مذاکرات کی تجویز دی، جس کے بعد یہ سلسلہ شروع ہوا۔ انہوں نے کہا کہ ہمیں مذاکرات سے اچھی توقعات ہیں اور امید ہے کہ اچھا نتیجہ نکلے گا۔ شیری رحمان نے کہا کہ پیپلز پارٹی نے ہمیشہ جمہوری طریقہ کار کو ہی اہمیت دی ہے اور تمام سیاسی جماعتوں کو بھی جمہوری طریقہ کار ہی اختیار کرنا چاہیے۔
انہوں نے کہا کہ پارلیمنٹ محفوظ جگہ ہے، جہاں ہر بات کی جا سکتی ہے۔ شیری رحمان نے مزید کہا کہ مذاکرات کی میز پر تمام معاملات زیر غور لائے جائیں، جہاں تمام جماعتیں اپنا موقف پیش کر رہی ہیں،پارٹی پوزیشن پر بات کرنا ہر کسی کا حق ہے ،ہر کوئی اپنی پارٹی پوزیشن پر بات کر سکتا ہے۔ انہوں نے کہا کہ مذاکرات میں کیا چل رہا ہے اس حوالے سے ابھی کوئی بات نہیں کر سکتی۔
شیری رحمان نے کہا کہ ہماری مذاکراتی ٹیم جو فیصلہ کرے گی، ہم وہی کریں گے، تمام ارکان سینئر اور ہمارے لیے قابل احترام ہیں۔ انہوں نے کہا کہ چیئرمین بلاول بھٹو اپنی پارٹی کا مؤقف پیش کر رہے ہیں،تمام سیاسی جماعتوں کی طرف سے بلاول بھٹو کے مؤقف کو تسلیم کیے جانے پر خوشی ہے۔ سینیٹر شیری رحمان نے کہا کہ کے پی کے وزیر اعلیٰ سہیل آفریدی کے ٹویٹ پر کوئی تبصرہ نہیں کروں گی، ہر شخص اپنے فیصلے خود کرنے کا اختیار رکھتا ہے۔
بشکریہ: اے پی پی (ایسوسی ایٹڈ پریس آف پاکستان)
