اسلام آباد۔6اکتوبر (اے پی پی):اقوام متحدہ کے سیکرٹری جنرل انتونیو گوتریس نے نیشنل ڈیزاسٹر مینجمنٹ اتھارٹی (این ڈی ایم اے) کے ہیڈکوارٹرز کا دورہ کیا جہاں انہیں پاکستان کے جدید، خودکار اور فعال ڈیزاسٹر مینجمنٹ نظام پر تفصیلی بریفنگ دی گئی۔دورے کے دوران اقوام متحدہ کے سیکرٹری جنرل نے این ڈی ایم اے کے نیشنل ایمرجنسیز آپریشن سینٹر کا معائنہ کیا۔ چیئرمین این ڈی ایم اے لیفٹیننٹ جنرل انعام حیدر ملک نے معزز مہمان کا خیرمقدم کیا اور سینٹر کے فعال کردار سمیت پاکستان میں قدرتی آفات سے نمٹنے اور خطرات کے پیشگی تدارک کے میکانزم کا تفصیلی جائزہ پیش کیا۔بریفنگ کے دوران این ڈی ایم اے حکام نے نیشنل ایمرجنسیز آپریشن سینٹر کی جدید ایکسٹینشنز یعنی ’’نیکسٹ جنریشن ٹیکنالوجی‘‘ اور ’’گلوبل ریزیلینس ہب‘‘ کے اغراض و مقاصد سے آگاہ کیا۔
سیکرٹری جنرل کو بتایا گیا کہ نیکسٹ جنریشن ٹیکنالوجی منصوبے کے تحت این ڈی ایم اے مصنوعی ذہانت ، مشین لرننگ اور جدید ڈیٹا اینالیٹکس سسٹمز کو بروئے کار لا رہا ہے جس سے آفات کی قبل از وقت تشخیص، پیشگی تیاری اور ریسپانس کی صلاحیتوں میں نمایاں اضافہ ہوگا۔ اس کے علاوہ ’’گلوبل ریزیلینس ہب‘‘ کے ذریعے علاقائی اور عالمی سطح پر ڈیزاسٹر مینجمنٹ کے شعبے میں ادارہ جاتی تعاون کو نئی وسعت ملے گی۔اس موقع پر این ڈی ایم اے کی تکنیکی ٹیم نے ملکی اور علاقائی سطح پر ممکنہ خطرات کا احاطہ کرنے والی جامع رپورٹ ’’نیشنل اینڈ گلوبل ڈیزاسٹر لینز 27-2026‘‘ پر بھی بریفنگ دی۔ شرکا ءکو بتایا گیا کہ یہ ڈیزاسٹر لینز جدید ترین ڈیٹا اور سائنسی تجزیاتی صلاحیتوں کے ذریعے ناگہانی آفات کے اثرات کو کم سے کم کرنے اور بروقت حفاظتی اقدامات اٹھانے میں کلیدی کردار ادا کرے گا۔
اقوام متحدہ کے سیکرٹری جنرل انتونیو گوتریس نے پاکستان میں آفات کے تدارک، جدید ارلی وارننگ سسٹم اور قبل از وقت حفاظتی تیاریوں کے لیے این ڈی ایم اے کے اقدامات کو سراہا۔ انہوں نے موسمیاتی تبدیلیوں اور تیزی سے بڑھتے ہوئے ماحولیاتی خطرات کے موثر سدباب کے لیے مربوط عالمی تعاون کو ناگزیر قرار دیا۔دورے کے اختتام پر پاکستان اور اقوام متحدہ کے مابین آفات کے خطرات میں کمی، ارلی وارننگ، فلاحی منصوبوں اور جدید ٹیکنالوجی کے تبادلے کے ذریعے عالمی شراکت داری کو مزید مستحکم بنانے کے پختہ عزم کا اعادہ کیا گیا۔
بشکریہ: اے پی پی (ایسوسی ایٹڈ پریس آف پاکستان)
