اسلام آباد۔4اکتوبر (اے پی پی):وفاقی وزیر برائے پارلیمانی امور ڈاکٹر طارق فضل چوہدری نے کہا ہے کہ خیبرپختونخوا میں سکیورٹی یقینی بنانا حکومت کی اولین ترجیح ہے جس سے حالیہ مذاکرات کے دوران اپوزیشن کو بھی آگاہ کیا گیا۔اتوار کو نجی ٹی وی سے گفتگو کرتے ہوئے وفاقی وزیر نے کہا کہ صوبائی حکومت کی نااہلی کے باعث جرائم پیشہ گروہوں سمیت دیگر عناصر کے پنپنے سے صوبے میں امن و امان کی صورتحال خراب ہوئی ہے۔
انہوں نے کہا کہ حکومت نےاپوزیشن کے ساتھ مذاکرات نیک نیتی سے کیے جبکہ اپوزیشن ارکان نے بھی تعمیری انداز میں بات چیت کے لیے آمادگی کا اظہار کیا۔ڈاکٹر طارق فضل چوہدری نے کہا کہ ملاقات کے دوران خیبرپختونخوا کی سکیورٹی صورتحال کے تمام پہلوؤں پر تفصیلی تبادلہ خیال کیا گیا،بالخصوص صوبے میں امن و امان برقرار رکھنے پر توجہ مرکوز رہی۔
انہوں نے کہا کہ حکومت کی جانب سے اجلاس میں پیش کیے گئے تمام نکات کا مقصد صوبے میں امن و امان برقرار رکھنا اور سکیورٹی کی صورتحال بہتر بنانا تھاتاہم خیبرپختونخوا حکومت کی جانب سے ان نکات پر مثبت ردعمل سامنے نہیں آیا۔
بشکریہ: اے پی پی (ایسوسی ایٹڈ پریس آف پاکستان)
