راولپنڈی۔6اکتوبر (اے پی پی):کمشنر راولپنڈی ڈویژن سلمان غنی نے کہا ہے کہ پاک چائنا فرینڈشپ گیمز 2026 میں راولپنڈی ڈویژن کے کھلاڑیوں کی شاندار کارکردگی ان کی محنت، عزم اور کھیلوں سے لگن کا ثبوت ہے۔ نوجوانوں میں مثبت سرگرمیوں کے فروغ اور وزیر اعلیٰ پنجاب مریم نواز شریف کے صحت مند پنجاب کے وژن کو عملی جامہ پہنانے کے لیے کھیلوں کی سرگرمیوں پر خصوصی توجہ دی جا رہی ہے۔ پاک چائنا فرینڈشپ گیمز 2026 میں راولپنڈی ڈویژن کے کھلاڑیوں نے مختلف کھیلوں میں مجموعی طور پر 5 گولڈ، 6 سلور اور 10 برونز میڈلز حاصل کیے۔ بیڈمنٹن مینز ٹیم نے گولڈ میڈل حاصل کیا جبکہ ایتھلیٹکس میں آمنہ عقیل اور بشریٰ ارشد نے پہلی پوزیشن حاصل کی۔
ووشو مینز مقابلوں میں محمد ارشد اور مسیب شفیع نے گولڈ میڈلز اپنے نام کیے۔ سلور میڈلز حاصل کرنے والوں میں والی بال ویمنز ٹیم، ایتھلیٹکس ویمنز میں فاطمہ عقیل اور مہوش کریم، ووشو مینز میں محمد فہیم اور محمد حسین جبکہ ایتھلیٹکس مینز میں اللہ دتہ شامل ہیں۔ اسی طرح برونز میڈلز جیتنے والوں میں ایتھلیٹکس ویمنز کی پاکیزہ امجد اور آمنہ خان، ایتھلیٹکس مینز کے عبدالواسع، ووشو ویمنز کی ردا فاطمہ، اذکا نور، مومنہ ارشاد اور عروہ ماہین، ووشو مینز کے ارحم عباسی اور شعیب ملک جبکہ جمناسٹکس مینز کے عبادت انور شامل ہیں۔
بشکریہ: اے پی پی (ایسوسی ایٹڈ پریس آف پاکستان)
