اسلام آباد۔5اکتوبر (اے پی پی):وفاقی وزیر اقتصادی امور و اسٹیبلشمنٹ ڈویژن احد چیمہ کی زیر صدارت چاول کی پیداوار سے متعلق اجلاس ہوا جس میں وزارت فوڈ سکیورٹی کے حکام کی جانب سے بتایا گیا کہ رائس پلانٹر کے استعمال سے پیداوار میں 15 فیصد اضافہ اور فی کلو پیداواری لاگت میں کمی ممکن ہوسکے گی۔اجلاس میں پنجاب اور سندھ سمیت ملک کے بڑے چاول پیدا کرنے والے علاقوں میں اس ٹیکنالوجی کے ممکنہ استعمال کا جائزہ لیا گیا۔
وزیر نے سیکرٹری فوڈ کو صوبائی حکومتوں سے مشاورت کے بعد جامع فزیبلٹی سٹڈی تیار کرنے کی ہدایت کی۔ سٹڈی میں اس منصوبے کی معاشی افادیت، پیداواری لاگت میں کمی کے امکانات اور چاول کی برآمدات پر ممکنہ اثرات کا جائزہ لیا جائے گا۔سینیٹر احد چیمہ نے کہا کہ اگر سٹڈی میں اس منصوبے کا قابل عمل ہونا ثابت ہوا تو وفاقی حکومت صوبائی حکومتوں کے اشتراک سے اس میں سرمایہ کاری کرے گی۔ سٹڈی میں وفاقی حکومت، صوبائی حکومتوں اور کسانوں کے درمیان اخراجات کی تقسیم کا طریقہ کار بھی تجویز کیا جائے۔
وفاقی وزیر نے سیکرٹری فوڈ کو صوبائی حکومتوں سے مشاورت کرتے ہوئے موزوں کسانوں کی نشاندہی اور متعلقہ چاول پیدا کرنے والے علاقوں میں رائس پلانٹرز کی منصفانہ تقسیم کے لیے بھی کہا۔ انہوں نے رائس ایکسپورٹرز ایسوسی ایشن آف پاکستان، انجینئرنگ ڈویلپمنٹ بورڈ، دیگر صوبائی سٹیک ہولڈرز اور رائس پلانٹرز استعمال کرنے والی نجی کمپنیوں سے مشاورت کی ہدایت بھی کی۔اس بات پر زور دیتے ہوئے کہ مشینری کے موثر استعمال اور دیکھ بھال کے لیے ضروری مہارت فراہم کرنا بھی منصوبے کا حصہ ہونا چاہیے۔
احد چیمہ نے کسانوں کی تربیت، فروخت کے بعد خدمات اور تکنیکی معاونت پر مشتمل ٹیکنالوجی منتقلی پروگرام کی ضرورت پر زور دیا۔وزیراعظم کے کوآرڈینیٹر برائے فوڈ سکیورٹی احمد عمیر، سیکریٹری فوڈ عامر علی احمد، سیکریٹری صنعت اور سینئر حکام نے اجلاس میں شرکت کی۔
بشکریہ: اے پی پی (ایسوسی ایٹڈ پریس آف پاکستان)
