راولپنڈئ۔ 05 اکتوبر (اے پی پی):ایم ڈی ستھرا پنجاب ایجنسی راولپنڈی رانا ساجد صفدر کی ہدایت پر شہر میں کوڑا کرکٹ پھیلانے اور جلانے کے خلاف انٹی لٹرنگ سکواڈ کی کارروائیاں جاری ہیں۔ اڈیالہ، فیصل کالونی، ہزارہ کالونی، ڈبل روڈ اور مری روڈ سمیت مختلف علاقوں میں انسپکشن کے دوران مجموعی طور پر 330 مقامات کا معائنہ کیا گیا جبکہ 30 خلاف ورزیاں سامنے آنے پر 30 وارننگ نوٹس جاری کیے گئے۔انسپکشن کے دوران کوڑا کرکٹ پھیلانے اور اسے جلانے والوں کو سموگ کے مضر اثرات اور ماحولیاتی آلودگی کے حوالے سے آگاہ کیا گیا اور آئندہ خلاف ورزی سے باز رہنے کی ہدایت کی گئی۔
دوسری جانب سموگ اور کوڑا کرکٹ کے خاتمے کے لیے سکولوں میں خصوصی آگاہی مہم بھی جاری ہے۔ کمیونیکیشن ٹیم نے طلبا کو انسدادِ لٹرنگ اور صاف ستھرے ماحول کی اہمیت پر لیکچر دیے جبکہ پمفلٹس بھی تقسیم کیے گئے۔ طلبا کو اپنا سفیر بناتے ہوئے انسدادِ کوڑا کرکٹ کا پیغام اپنے گھروں اور محلوں تک پہنچانے کی تلقین کی گئی۔سموگ کی روک تھام کے لیے شہر کی مختلف شاہراہوں اور اہم مقامات پر واشنگ، سوئیپنگ اور سکریپنگ کا عمل بھی جاری ہے، تاکہ سڑکوں کے کناروں اور اطراف میں موجود گرد و غبار اور مٹی کا خاتمہ کیا جا سکے۔
ایم ڈی رانا ساجد صفدر نے متعلقہ ٹیموں کو ہدایت کی ہے کہ انسدادِ لٹرنگ اور سموگ مہم کو مؤثر انداز میں جاری رکھا جائے اور شہریوں میں صفائی، ماحول کے تحفظ اور کوڑا نہ جلانے کے حوالے سے شعور اجاگر کیا جائے۔
بشکریہ: اے پی پی (ایسوسی ایٹڈ پریس آف پاکستان)
