راولپنڈی۔ 18 نومبر (اے پی پی):راولپنڈی چیمبرآف کامرس اینڈ انڈسٹری (آر سی سی آئی) کے زیر اہتمام پنجاب حکومت کے محکمہ صنعت، تجارت و سرمایہ کاری اور دی اربن یونٹ کے اشتراک سے کامن فیسیلٹی سینٹر (سی ایف سی) فنانسنگ پراجیکٹ کے حوالے سے آگاہی سیشن 20 نومبر جمعہ کو ہو گا۔یہ سیشن وزیراعلیٰ پنجاب کے اقتصادی تبدیلی کے ایجنڈے پنجابز انوویشن فار ویلیو، اپرچیونٹی اینڈ ٹرانسفارمیشن (PIVOT) کے تحت منعقد کیا جا رہا ہے، جس کا مقصد صنعتی کلسٹرز کو مشترکہ مشینری، پلانٹس اور آلات کی خریداری کے لیے مالی معاونت فراہم کرنے کے منصوبے سے کاروباری برادری کو آگاہ کرنا ہے۔
منصوبے کے تحت منظور شدہ ہر تجویز کے لیے 30 کروڑ روپے تک مالی معاونت فراہم کرنے کی سہولت دستیاب ہوگی، جس سے صنعتی شعبے میں مشترکہ سہولیات کے فروغ، پیداواری صلاحیت میں اضافے اور کاروباری سرگرمیوں کو تقویت دینے میں مدد ملے گی۔آگاہی سیشن آر سی سی آئی کے دفتر میں سہ پہر 3 بجے منعقد ہوگا، جس میں چیمبر کے اراکین، صنعتکاروں اور متعلقہ شعبوں کے سٹیک ہولڈرز کو شرکت کی دعوت دی گئی ہے تاکہ وہ اس مالی معاونت کے منصوبے سے استفادہ کرنے کے طریقہ کار اور مواقع سے آگاہ ہو سکیں۔
بشکریہ: اے پی پی (ایسوسی ایٹڈ پریس آف پاکستان)



