اسلام آباد۔4اکتوبر (اے پی پی):انسپکٹر جنرل آف پولیس اسلام آباد کیپٹن (ر) محمد سہیل چوہدری کے خصوصی احکامات کی روشنی میں اسلام آباد پولیس نے وفاقی دارالحکومت میں موجود گرجا گھروں کی فول پروف سکیورٹی کو یقینی بنانے کے لیے مؤثر اقدامات کیے ہیں۔اسی سلسلے میں ایس پی سٹی زون محمد خرم اشرف اتوار کے روز بھی فیلڈ میں متحرک رہے اور ضلع بھر کے مختلف گرجا گھروں کا دورہ کیا۔ پولیس ترجمان کے مطابق اس موقع پر انہوں نے سکیورٹی ڈیوٹی پرتعینات پولیس افسران و جوانوں سے ملاقات کی، ان کے فرائض کی انجام دہی کا جائزہ لیا اور سکیورٹی انتظامات کو مزید بہتر بنانے کے لیے ہدایات جاری کیں۔
انہوں نے گرجا گھروں کے داخلی و خارجی راستوں، پارکنگ ایریاز اور گرد و نواح میں تعینات پولیس نفری سمیت مجموعی سکیورٹی پلان کا بھی معائنہ کیا۔ایس پی سٹی زون نے گرجا گھروں کی انتظامیہ سے ملاقات کے دوران کہا کہ اسلام آباد پولیس بلا تفریق تمام مذاہب کے پیروکاروں کے جان و مال کے تحفظ کے لیے ہر وقت سرگرمِ عمل ہے۔انہوں نے شہریوں سے اپیل کی کہ وہ پولیس کے ساتھ بھرپور تعاون کریں اور کسی بھی مشکوک شخص یا سرگرمی کی اطلاع فوری طور پر متعلقہ پولیس اسٹیشن یا پولیس ہیلپ لائن "پکار-"15 پر دیں۔
انہوں نے کہا کہ پولیس اور عوام کے درمیان باہمی تعاون ہی امن و امان کے قیام کی بنیاد ہے۔ اسلام آباد پولیس اپنے فرائض قومی جذبے، فرض شناسی اور اعلیٰ پیشہ ورانہ صلاحیتوں کے ساتھ انجام دے رہی ہے تاکہ وفاقی دارالحکومت میں محفوظ اور پُرامن ماحول کو برقرار رکھا جا سکے۔ایس پی سٹی زون نے مزید کہا کہ اسلام آباد پولیس کی اولین ترجیح شہریوں کے جان و مال کا تحفظ اور قانون کی بالادستی کو یقینی بنانا ہے۔
C:ahc-usd/P:ahc/L:tam/E:tam/I:wam/R:wam
بشکریہ: اے پی پی (ایسوسی ایٹڈ پریس آف پاکستان)
