اسلام آباد۔4اکتوبر (اے پی پی):اسلام آباد پولیس نےجرائم پیشہ عناصر کے خلاف مؤثر اور بلاامتیاز کریک ڈاؤن کرتے ہوئےگزشتہ دو ہفتوں کے دوران 498 ملزمان کو گرفتار کرلیا اورمنشیات، غیر قانونی اسلحہ اور دیگر جرائم کے خلاف کارروائیاں تیز کر دیں۔پولیس ترجمان کے مطابق انسپکٹر جنرل آف پولیس اسلام آباد کیپٹن ریٹائرڈ محمد سہیل چوہدری کی خصوصی ہدایات پر اسلام آباد پولیس کا جرائم پیشہ عناصر کے خلاف مؤثر اور بلاامتیاز کریک ڈاؤن جاری ہے۔ اس سلسلے میں گزشتہ دو ہفتوں کے دوران جرائم پیشہ دعناصر،منشیات فروشوں اور اشتہاری اور عدالتی مفرور ملزمان کے خلاف کریک ڈاؤن کے دوران 498 ملزمان کو گرفتار کیا گیا۔
اسلام آباد پولیس نے منشیات فروشوں کے خلاف بھرپور کارروائیاں کرتے ہوئے 73 ملزمان کو گرفتار کیا۔ گرفتار ملزمان کے قبضے سے 13,692 گرام چرس، 4,521 گرام ہیروئن، 12,402 گرام آئس اور 892 بوتلیں شراب برآمد کی گئی۔اسی طرح غیر قانونی اسلحہ رکھنے اور اسلحے کی نمائش میں ملوث 111 ملزمان کو گرفتارکیا گیا۔ گرفتار ملزمان کے قبضے سے تین کلاشنکوف، چار گنز و رائفلز، 11 خنجر اور مختلف بور کے 94 پستول برآمد ہوئے۔اشتہاری، عادی مجرمان اور عدالتی مفرور ملزمان کے خلاف جاری کریک ڈاؤن کے دوران گزشتہ دو ہفتوں میں 314 اشتہاری اور دیگر مطلوب ملزمان کو گرفتار کیا گیا۔اسی طرح جرائم پیشہ عناصر کے خلاف کارروائیوں اور شہریوں کے جان و مال کے تحفظ کو یقینی بنانے کے لیے اسلام آباد کے مختلف علاقوں میں گزشتہ دو ہفتوں کے دوران 114 گرینڈ کومبنگ و سرچ آپریشنزکیے گئے۔
ان سرچ آپریشنز کے دوران 6,328 افراد اور 2,617 گھروں کی چیکنگ کی گئی، جبکہ 271 ہوٹلز، 640 دکانوں، 3,036 موٹر سائیکلوں اور 1,206 گاڑیوں کی بھی جانچ پڑتال کی گئی۔مزید جانچ پڑتال اور تصدیق کے لیے 382 مشکوک افراد، 328 موٹر سائیکلوں اور 10 گاڑیوں کو متعلقہ تھانوں میں منتقل کیا گیا۔ڈی آئی جی اسلام آباد علی وسیم نے کہا کہ اسلام آباد پولیس شہریوں کے جان و مال کے تحفظ اور جرائم کے خاتمے کے لیے تمام دستیاب وسائل بروئے کار لا رہی ہے۔ جرائم پیشہ عناصر کے خلاف بلاامتیاز کارروائیوں کا سلسلہ جاری رہے گا، جبکہ شہریوں کو محفوظ ماحول فراہم کرنے کے لیے مؤثر پولیسنگ کو مزید بہتر بنایا جا رہا ہے۔
انہوں نے کہا کہ اسلام آباد پولیس منشیات فروشی، غیر قانونی اسلحے، اسلحے کی نمائش، اشتہاری و عدالتی مفرور ملزمان اور دیگر جرائم پیشہ عناصر کے خلاف کارروائیوں کو مزید مؤثر بنائے گی۔ڈی آئی جی اسلام آباد نے اس عزم کا اظہار کیا کہ شہریوں کے جان و مال کا تحفظ اور شہر میں امن و امان کا قیام اسلام آباد پولیس کی اولین ترجیح ہے۔جرائم کے سدباب اور شہریوں کو محفوظ ماحول کی فراہمی کے لیے کارروائیاں بلاامتیاز اور تسلسل کے ساتھ جاری رکھی جائیں گی۔
بشکریہ: اے پی پی (ایسوسی ایٹڈ پریس آف پاکستان)
