پشاور۔ 06 اکتوبر (اے پی پی):وزیراعلیٰ خیبرپختونخوا کے معاون خصوصی برائے داخلہ و قبائلی امور طارق سعید مروت نے ڈیرہ اسماعیل خان میں دہشت گردی کے ہونے والے دو علیحدہ واقعات کی شدید مذمت کی ہے۔انہوں نے مذکورہ واقعات میں قیمتی انسانی جانوں کے ضیاع پر گہرے دکھ اور افسوس کا اظہارکرتے ہوئے شہداء کے لواحقین سے دلی ہمدردی اور تعزیت کی ہے۔معاون خصوصی نے کہا ہے کہ ضلع میں پیش آنے والے دہشتگردی کے دو واقعات انتہائی افسوسناک ہیں۔انہوں نے کہا کہ عوام کی جان و مال کے تحفظ کے لیے فرائض انجام دینے والے پولیس اور دیگر سرکاری اہلکار قوم کے محافظ ہیں اور دہشتگردی کے خلاف جنگ میں سرکاری اہلکاروں اور اداروں کی قربانیاں ناقابلِ فراموش ہیں۔
طارق سعید مروت نے کہا کہ فتنۃ الخوارج اور ان کے سہولت کاروں کے خلاف ریاستی ادارے متحد ہیں کسی صورت بھی دہشتگرد عناصر کو صوبے میں امن و امان کو سبوتاژ کرنے کی اجازت نہیں دی جائے گی اور عوام کے تحفظ اور پائیدار امن کے قیام کے لیے تمام دستیاب وسائل بروئے کار لائے جا رہے ہیں۔انہوں نے کہا کہ دہشتگردی کے خاتمے کے لیے مربوط حکمتِ عملی کے تحت کارروائیاں جاری رہیں گی اور دہشتگرد عناصر اور ان کے سہولت کاروں کے خلاف قانون کے مطابق مؤثر اقدامات مزید تیز کیے جائیں گے۔معاون خصوصی نے تمام شہداء کے درجات کی بلندی، لواحقین کے لیے صبر جمیل اور زخمی پولیس اہلکار کی جلد اور مکمل صحت یابی کے لیے دعا بھی کی ہے۔
بشکریہ: اے پی پی (ایسوسی ایٹڈ پریس آف پاکستان)
