پشاور۔ 06 اکتوبر (اے پی پی):چیف کمشنر محمد علی شہزادہ اور کمشنر شوکت علی یوسفزئی پر مشتمل رائٹ ٹو پبلک سروس کمیشن کے دو رکنی بینچ نے مختلف خدمات تک رسائی میں تاخیر پر کئی ایک متعلقہ محکموں کو نوٹس جاری کیے ہیں۔ عوامی شکایات پر کارروائی کرتے ہوئے دو رکنی بینچ نے اسلحہ لائسنس کی ویریفیکیشن میں تاخیر، گاڑی کی رجسٹریشن اور منتقلی کی شکایات، زمین کی حدبراری،اسلحہ لائسنس کے اجراء، ڈومیسائل سرٹیفیکیٹ اور زمین کے فرد کے اجراء میں تاخیر پر پشاور، ڈی آئی خان ،کوہاٹ، لکی مروت اور ایبٹ آباد میں متعلقہ محکمو ں کے سربراہان کو نوٹسز جاری کیے ہیں۔
کمیشن نے عوامی شکایات کے پیش نظر بنوں ، دیر پائیں اور ایبٹ آباد میں پولیس اور سول انتظامیہ کے افسران کو بذات خود عوامی مسائل سن کر حل کرنے کے احکامات جاری کیے ہیں۔ کمیشن نے اسامہ رؤف کو سعودی عرب، فرمان اللہ کو بنوں اور محمد رضوان کوایبٹ آباد سے آن لائن ویڈیو کالز کے ذریعے سنا۔ کمیشن کے ترجمان نے کہا ہے کہ کمیشن صوبے میں عوامی آگاہی شفاف طرز حکمرانی اور عوامی خدمات کی بروقت فراہمی کو یقینی بنانے کے لیے کوئی دقیقہ فروگزاشت نہیں کرے گا۔
بشکریہ: اے پی پی (ایسوسی ایٹڈ پریس آف پاکستان)
