راولپنڈی۔ 01 اکتوبر (اے پی پی):پنجاب میں آبی پرندوں کے شکار کا سیزن 2026-27ء یکم اکتوبر سے شروع ہوگیا ہے جو 31 مارچ 2027ء تک جاری رہے گا۔ محکمہ وائلڈ لائف اینڈ پارکس پنجاب کی جاری کردہ ہدایات کے مطابق آبی پرندوں کا شکار صرف ہفتہ اور اتوار کے روز مجاز شوٹنگ پرمٹ کے ساتھ کیا جاسکے گا۔
محکمہ وائلڈ لائف کے مطابق محفوظ علاقوں میں ہر قسم کے شکار پر پابندی ہوگی جبکہ شکاریوں کو مقررہ بیگ لمٹ کے مطابق شکار کرنے کی ہدایت کی گئی ہے،گاڑی سے شکار کرنا بھی ممنوع قرار دیا گیا ہے۔
محکمہ وائلڈ لائف کی جانب سے ہدایات میں کہا گیا ہے کہ شکار کے دوران فصلوں اور املاک کو نقصان نہ پہنچایا جائے اور عوام کے لیے کسی قسم کی پریشانی یا خلل پیدا کرنے سے گریز کیا جائے۔ محکمہ وائلڈ لائف نے شکاریوں پر زور دیا ہے کہ وہ قدرتی ماحول کا احترام کرتے ہوئے ذمہ داری کے ساتھ شکار کریں اور مقررہ قوانین و ضوابط کی مکمل پابندی یقینی بنائیں۔
محکمہ وائلڈ لائف نے واضح کیا ہے کہ غیر قانونی شکار کی صورت میں قانون کے مطابق کارروائی عمل میں لائی جائے گی۔
بشکریہ: اے پی پی (ایسوسی ایٹڈ پریس آف پاکستان)
