راولپنڈی۔5اکتوبر (اے پی پی):پنجاب فوڈ اتھارٹی نے جہلم اور دینہ میں علی الصبح کارروائی کرتے ہوئے 2100 لیٹر ناقص، ملاوٹی اور پانی ملا دودھ تلف کر دیا جبکہ ملاوٹی دودھ سپلائی کرنے والے دو دودھ ٹینکروں پر مجموعی طور پر ایک لاکھ روپے جرمانہ عائد کیا گیا۔پیر کو پنجاب فوڈ اتھارٹی کے ترجمان کے مطابق ڈائریکٹر جنرل پنجاب فوڈ اتھارٹی راجہ منصور احمد کی ہدایت پر جہلم اور دینہ میں مین جی ٹی روڈ پر قائم چیک پوسٹوں پر کارروائی کی گئی۔
فوڈ اتھارٹی کی ٹیموں نے دو دودھ ٹینکروں میں موجود 11 ہزار لیٹر دودھ کی جانچ کی جس میں 2100 لیٹر دودھ ناقص، غیر معیاری اور پانی ملا پایا گیا جسے موقع پر ہی تلف کر دیا گیا۔ترجمان کے مطابق مذکورہ دودھ منڈی بہائوالدین کی دودھ منڈی سے لایا گیا تھا اور اسے جہلم، دینہ اور راولپنڈی میں سپلائی کیا جانا تھا۔ پنجاب فوڈ اتھارٹی کی بروقت کارروائی سے شہریوں کو غیر معیاری دودھ کی فراہمی سے محفوظ رکھا گیا۔ ترجمان نے شہریوں سے اپیل کی کہ کسی بھی شکایت کی صورت میں پنجاب فوڈ اتھارٹی کی ہیلپ لائن 1223 پر رابطہ کریں۔
بشکریہ: اے پی پی (ایسوسی ایٹڈ پریس آف پاکستان)
