لاہور۔7اکتوبر (اے پی پی):صوبائی وزیر صحت خواجہ سلمان رفیق نے بدھ کے روز چلڈرن ہسپتال راولپنڈی اور راولپنڈی انسٹی ٹیوٹ آف کارڈیالوجی کا دورہ کیا۔سیکرٹری صحت پنجاب عظمت محمود بھی ان کے ہمراہ تھے ۔ترجمان محکمہ صحت کے مطابق صوبائی وزیر کو چلڈرن ہسپتال میں جاری ترقیاتی کام کے حوالے سے بریفنگ دیتے ہوئے بتایا گیا کہ چلڈرن ہسپتال میں اب تک 40 فیصد تعمیراتی کام مکمل ہو چکا ہے۔طبی عملے کے لیے ہاسٹل کی تعمیر بھی جاری ہے۔صوبائی وزیرنے متعلقہ حکام کو ہسپتال میں جاری ترقیاتی کام کو بروقت مکمل کرنے کی ہدایت کی۔
صوبائی وزیر خواجہ سلمان رفیق نے کہا کہ وزیر اعلیٰ پنجاب مریم نواز شریف کی ہدایات کی روشنی میں چلڈرن ہسپتال راولپنڈی میں تعمیراتی کام تیزی سے جاری ہے۔ہسپتال میں جاری ترقیاتی کام کے معیار اور رفتار پر کسی قسم کا سمجھوتا نہیں کیا جائے گا۔سیکرٹری صحت پنجاب عظمت محمود نے کہا کہ چلڈرن ہسپتال راولپنڈی میں جدید ترین صحت سہولیات فراہم کی جائیں گی،چلڈرن ہسپتال اگلے برس مکمل طور پر فعال ہو جائے گا۔بعد ازاں انہوں نے راولپنڈی انسٹی ٹیوٹ آف کارڈیالوجی کابھی دورہ کیا۔صوبائی وزیر کو ادارے کی کارکردگی، صحت سہولیات اور انتظامی امور کے حوالے سے بریفنگ دی گئی۔
صوبائی وزیر نے ہسپتال میں جدید فارمیسی کا افتتاح کیا۔ خواجہ سلمان رفیق نے کہا کہ راولپنڈی انسٹی ٹیوٹ آف کارڈیالوجی کو آئی ایس او سرٹیفیکیشن حاصل کرنے پر شاباش اور مبارکباد پیش کرتے ہیں ۔سیکرٹری صحت پنجاب عظمت محمود نے کہا کہ آر آئی سی میں علاج کی غرض سے لوگ نہ صرف علاقائی سطح بلکہ کے پی کے، گلگت بلتستان اور کشمیر سے بھی آتے ہیں ۔انہوں نے کہا کہ پنجاب میں صحت سہولیات کو عالمی معیار کے مطابق فراہم کرنے کے لیے عملی اقدامات کیے ہیں ۔
بشکریہ: اے پی پی (ایسوسی ایٹڈ پریس آف پاکستان)
