سیالکوٹ۔ 07 اکتوبر (اے پی پی):ڈپٹی کمشنر سیالکوٹ اویس مشتاق نے پسرور کے دورے کے دوران تحصیل ہیڈ کوارٹر ہسپتال چونڈہ اور مریم نواز ہسپتال کلاسوالہ کا معائنہ کیا اور مریضوں کو فراہم کی جانے والی طبی و دیگر سہولیات کا تفصیلی جائزہ لیا۔تحصیل ہیڈ کوارٹر ہسپتال چونڈہ کے دورے کے موقع پر ڈپٹی کمشنر نے ڈیوٹی روسٹر، ادویات کی دستیابی اور دیگر طبی انتظامات کا معائنہ کیا جبکہ مریضوں سے براہ راست فیڈ بیک بھی لیا اور ہسپتال میں فراہم کی جانے والی سہولیات کے بارے میں دریافت کیا۔
ڈپٹی کمشنر نے ہسپتال انتظامیہ کو مریضوں کو بروقت اور معیاری طبی سہولیات کی فراہمی یقینی بنانے کی ہدایت کی۔مریم نواز ہسپتال کلاسوالہ کے دورے کے دوران ڈپٹی کمشنر نے ہسپتال کے مختلف کمروں کا معائنہ کیا اور مریضوں کو فراہم کی جانے والی طبی سہولیات کا جائزہ لیا۔ انہوں نے ہسپتال میں صفائی ستھرائی کے انتظامات بھی چیک کئے اور انتظامیہ کو صفائی کے معیار کو مزید بہتر بنانے کی ہدایت کی۔ اسسٹنٹ کمشنر پسرور ثناء شرافت بھی اس موقع پر ہمراہ تھیں۔
بشکریہ: اے پی پی (ایسوسی ایٹڈ پریس آف پاکستان)
