اسلام آباد۔7اکتوبر (اے پی پی):سلطنت بحرین کے وزیر خارجہ ڈاکٹر عبداللطیف بن راشد الزیانی دو روزہ سرکاری دورہ پر بدھ کو اسلام آباد پہنچ گئے۔ ترجمان دفتر خارجہ کی طرف سے جاری بیان کے مطابق سلطنت بحرین کے وزیر خارجہ 7 سے 8 اکتوبر 2026ء تک پاکستان کے سرکاری دورے پر ہیں۔
سیکرٹری اقتصادی امور ڈویژن (ای اے ڈی) محمد حمیر کریم اور ایڈیشنل سیکرٹری (مشرق وسطیٰ) زاہد حسین نے ہوائی اڈے پر معزز مہمان کا استقبال کیا۔ یہ دورہ پاکستان اور بحرین کے درمیان قریبی، خوشگوار اور برادرانہ تعلقات کا عکاس اور باہمی تعاون کو مزید مضبوط بنانے کے مشترکہ عزم کا اظہار ہے۔
بشکریہ: اے پی پی (ایسوسی ایٹڈ پریس آف پاکستان)
