لاہور۔31اکتوبر (اے پی پی):وزیراعلی پنجاب مریم نواز شریف نے کہا ہے کہ صاف، سرسبز، محفوظ اور جدید شہر ہر شہری کا بنیادی حق ہے۔ شہروں کی ترقی دراصل عوام کے معیارِ زندگی کو بہتر بنانے کا نام ہے۔ پنجاب کے شہروں کو جدید شہری سہولیات سے آراستہ کرنا حکومت کی ترجیحات میں شامل ہے۔ شہروں کے عالمی دن پر اپنے بیان میں وزیراعلی مریم نواز شریف نے کہاکہ ماحول دوست اور پائیدار شہری ترقی وقت کی اہم ضرورت ہے۔ شہری علاقوں میں صفائی، نکاسی آب، ٹریفک مینجمنٹ اور بنیادی سہولیات کی بہتری کے لیے اقدامات جاری ہیں۔ جدید ٹیکنالوجی کے ذریعے شہروں کو اسمارٹ اور شہری زندگی کو آسان بنایا جا سکتا ہے۔وزیراعلی مریم نواز شریف نے کہاکہ تجاوزات سے پاک، صاف ستھرے اور خوبصورت شہر ہماری اجتماعی ذمہ داری ہیں۔ شہری ترقی میں عوامی شمولیت اور ذمہ دارانہ طرزِ عمل کلیدی اہمیت رکھتے ہیں۔ وزیراعلی مریم نوازشریف نے کہاکہ آنے والی نسلوں کے لیے سرسبز، محفوظ اور پائیدار شہر چھوڑنا ہمارا عزم ہے۔ شہروں کی منصوبہ بندی ایسی ہونی چاہیے جس میں ہر طبقے کے لیے یکساں سہولیات اور مواقع میسر ہوں۔
بشکریہ: اے پی پی (ایسوسی ایٹڈ پریس آف پاکستان)



