لاہور۔4اکتوبر (اے پی پی):لاہور ٹریفک پولیس نے ون ویلرز اور تیز رفتار ہیوی بائیکرز کے خلاف کریک ڈائون تیز کردیا۔ سی ٹی او لاہور سید عبدالرحیم شیرازی کے حکم پر متعدد شاہراہوں پر خصوصی ٹیمیں تعینات کردی گئی ہیں جبکہ مین بلیوارڈ کو ہیوی بائیکرز کے لیے نوگو ایریا قرار دے دیا گیا ہے۔ سی ٹی او لاہور کے مطابق ویک اینڈ پر مڈنائٹ کے دوران ہیوی بائیکرز کی ٹولیوں کی صورت میں ریسنگ، شور اور ہلڑبازی کی شکایات موصول ہوئی ہیں۔
ڈیفنس مین بلیوارڈ، کینال روڈ، مین بلیوارڈ گلبرگ اور سی بی ڈیبلیوارڈ پر ریسنگ اور روڈ بلاکنگ کے خلاف کارروائی کی جائے گی۔ سی ٹی او نے ڈویژنل اور سرکل افسران کو اپنی نگرانی میں کریک ڈائون جبکہ نائٹ شفٹ ڈیوٹی کو بھی تیز رفتاری کے خلاف موثر کارروائی کی ہدایت کی ہے۔ سیف سٹی کیمروں سے بھی ون ویلرز اور تیز رفتار موٹر سائیکل سواروں کی نشاندہی کی جائے گی اور خلاف ورزی پر مقدمات درج کروائے جائیں گے۔
بشکریہ: اے پی پی (ایسوسی ایٹڈ پریس آف پاکستان)
