اسلام آباد۔2اکتوبر (اے پی پی):وفاقی وزیر صحت سید مصطفیٰ کمال نے سندھ میں ایم ڈی کیٹ 2026 کے انعقاد سے متعلق سامنے آنے والی شکایات کا سنجیدگی سے نوٹس لیتے ہوئے کہا ہےکہ سندھ میں ایم ڈی کیٹ 2026 کے انعقاد میں شفافیت اور فیئر پلے سے متعلق سوالات اٹھائے گئے ہیں۔ سوشل میڈیا پر بھی متعدد شکایات سامنے آئی ہیں جبکہ عوامی نمائندوں کی جانب سے بھی صورتحال پر تشویش کا اظہار کیا گیا ہے۔
وزارت صحت کی جانب سے جاری بیان کے مطابق سندھ حکومت، پاکستان میڈیکل اینڈ ڈینٹل کونسل (پی ایم ڈی سی) اور ایم ڈی کیٹ منعقد کرنے والی یونیورسٹی مل کر امتحان کے انعقاد سے متعلق شکایات کا جائزہ لیں گے۔امتحانی مراکز کے نتائج، حاصل کردہ نمبرز، فیصد اور پاس ریٹ کا تقابلی جائزہ لیا جائے گا۔ مختلف امتحانی مراکز کے نتائج میں غیر معمولی طور پر زیادہ نمبرز یا نمایاں فرق کی بھی جانچ کی جائے گی۔وزارت صحت کے مطابق حاضری شیٹس، سیٹنگ پلان، امتحانی مراکز کا ریکارڈ اور نتائج کا ڈیٹا انکوائری کا حصہ ہوگا۔ ایم ڈی کیٹ میں بے ضابطگی، غیر مجاز معاونت، جعل سازی، سوالات کے افشاء اور انتظامی غفلت سے متعلق شکایات کا بھی جائزہ لیا جائے گا۔
کسی تکنیکی خرابی یا دیگر بے ضابطگی کے باعث امتحان متاثر ہونے کی صورت میں ذمہ داری کا تعین کیا جائے گا۔وزارت صحت کے مطابق پی ایم ڈی سی امتحان کے انعقاد اور نتائج مرتب کرنے سے متعلق تمام متعلقہ ریکارڈ بھی فراہم کرے گا تاکہ شکایات کا شفاف اور جامع جائزہ لیا جا سکے۔وفاقی وزیر صحت نے ہدایت کی کہ ایم ڈی کیٹ 2026 سے متعلق انکوائری رپورٹ 15 روز کے اندر وزارت صحت کو پیش کی جائے۔
بشکریہ: اے پی پی (ایسوسی ایٹڈ پریس آف پاکستان)
