پشاور۔ 07 اکتوبر (اے پی پی):گورنر خیبر پختونخوا فیصل کریم کنڈی سے صدر خیبر چیمبر آف کامرس اینڈ انڈسٹری اور چیئرمین پاکستان بارڈرز ٹریڈ کونسل سید جواد حسین کاظمی کی قیادت میں ملاگوری ماربل انڈسٹریز ایسوسی ایشن اور باڑہ اسٹیل اینڈ فرنس انڈسٹریز کے وفد نے گورنر ہاوس پشاور میں ملاقات کی۔بدھ کو ترجمان گورنر ہاوس پشاور کے مطابق وفد میں ملک شیرین خان آفریدی، ملک بسم اللہ خان آفریدی، ملک منان، ملک فضلِ مولا، روزی گل، محمد ہارون صابر، شکیل وحید اللہ خان، سینئر صحافی قاضی فضل اللہ، مرتضیٰ خان اور حاجی فریدون خان سمیت دیگر کاروباری شخصیات شامل تھیں ۔
اس موقع پر ملاگوری ماربل انڈسٹریز اور باڑہ اسٹیل و فرنس انڈسٹریز کو درپیش مشکلات اور مسائل پر تفصیلی تبادلۂ خیال کیا گیا۔ وفد نے گورنر خیبر پختونخوا کو واپڈا بجلی کی فراہمی اور قیمتوں سے متعلق مسائل، کمرشل بینکوں کے ذریعے صنعتوں کو آسان اقساط کی فراہمی، ملاگوری کو باقاعدہ ماربل انڈسٹریل زون ڈیکلیئر کرنے اور ضم شدہ اضلاع پر عائد ٹیکسز کے نفاذ کے خلاف کاروباری برادری کے تحفظات سے آگاہ کیا۔ گورنر خیبر پختونخوا فیصل کریم کنڈی نے وفد کے مسائل اور تحفظات کو غور سے سنا اور متعلقہ حکام کے ساتھ رابطہ کرکے مسائل کے حل کے لیے ہر ممکن تعاون کی یقین دہانی کرائی۔
بشکریہ: اے پی پی (ایسوسی ایٹڈ پریس آف پاکستان)
