سانگلہ ہل ۔ 01 اکتوبر (اے پی پی):وزیراعلیٰ پنجاب محترمہ مریم نواز شریف کی جانب سے ضلع ننکانہ صاحب میں عوام کو بہتر شہری سہولیات کی فراہمی، شہروں کی خوبصورتی، بنیادی ڈھانچے کی بہتری اور دیرینہ عوامی مسائل کے حل کے لیے پنجاب ڈویلپمنٹ پروگرام (PDP)، بیوٹیفیکیشن، ماڈلپروگرام اور دیگر ترقیاتی منصوبوں پر کام تیزی سے جاری ہے۔
ان خیالات کا اظہار ڈپٹی کمشنر ننکانہ صاحب رعنا حمید نے سانگلہ ہل پریس کلب کے صدر ایم نواز تبسم کی زیرِ قیادت صحافیوں کے وفد، ساجد بٹ، ملک عابد اور میاں سیف الرحمن سے اپنے دفتر میں گفتگو کرتے ہوئے کیا،ڈپٹی کمشنر رعنا حمید نے کہا کہ ضلع بھر میں جاری ترقیاتی منصوبوں کی باقاعدہ نگرانی کی جا رہی ہے جبکہ متعلقہ محکموں کو کام کے معیار اور مقررہ مدت کو یقینی بنانے کی ہدایات جاری کی گئی ہیں۔
انہوں نے کہا کہ ترقیاتی منصوبوں کا بنیادی مقصد شہریوں کو بہتر اور پائیدار بنیادی سہولیات فراہم کرنا ہے انہوں نے بتایا کہ مختلف علاقوں میں سڑکوں اور گلیوں کی تعمیر و بحالی، سیوریج لائنوں کی بہتری، بارشی پانی کی نکاسی کے نظام، گلیوں کی پختگی، ٹف ٹائلز کی تنصیب، اسٹریٹ لائٹس کی فراہمی، بازاروں اور اہم شاہراہوں کی تزئین و آرائش، پارکس کی بہتری اور شہری انفراسٹرکچر کی اپ گریڈیشن سمیت متعدد کام جاری ہیں۔
پنجاب حکومت کے PDP میں بھی سیوریج، سٹرم واٹر ڈرینج، سٹریٹ پَیوِمنٹس اور متعلقہ انفراسٹرکچر کی بہتری کو مرکزی حیثیت دی گئی ہےرعنا حمید نے کہا کہ ترقیاتی منصوبوں کے ساتھ ساتھ صفائی ستھرائی، نکاسی آب، تجاوزات کے خاتمے، شہری علاقوں کی خوبصورتی اور عوامی مقامات کی بہتری پر بھی خصوصی توجہ دی جا رہی ہے تاکہ شہریوں کو صاف ستھرا اور بہتر ماحول میسر آ سکے انہوں نے کہا کہ ضلع کے مختلف شہروں اور قصبات میں عوامی ضرورت کے مطابق ترقیاتی کاموں کو ترجیح دی جا رہی ہے جبکہ منصوبوں کی تکمیل کے بعد شہریوں کو آمدورفت، نکاسی آب اور دیگر بنیادی سہولیات میں نمایاں بہتری حاصل ہوگی
ڈپٹی کمشنر نے مزید کہا کہ ضلعی انتظامیہ کی اوپن ڈور پالیسی کے تحت روزانہ کی بنیاد پر آنے والے سائلین کے مسائل سنے اور انہیں ترجیحی بنیادوں پر حل کیا جا رہا ہے عوامی شکایات کے ازالے اور سرکاری اداروں کی کارکردگی بہتر بنانے کے لیے متعلقہ افسران کو بھی ضروری ہدایات جاری کی جاتی ہیں انہوں نے کہا کہ ضلعی انتظامیہ کا مقصد ترقیاتی منصوبوں کو شفاف انداز میں آگے بڑھانے کے ساتھ ساتھ عوام کو بنیادی سہولیات کی فراہمی اور سرکاری اداروں میں بہتر سروس ڈیلیوری کو یقینی بنانا ہے۔
بشکریہ: اے پی پی (ایسوسی ایٹڈ پریس آف پاکستان)
