اسلام آباد۔1اکتوبر (اے پی پی):پاکستان میں ٹیکسٹائل صنعت کے فروغ، غیر ملکی سرمایہ کاری اور برآمدات میں اضافے کے لیے اہم پیش رفت سامنے آئی ہے، چینی کمپنی چیلنج فیشن نے پاکستان میں جدید ٹیکنالوجی سے آراستہ ایک بڑے ٹیکسٹائل و گارمنٹس صنعتی مرکز کے قیام کا اعلان کیا ہے۔ایس آ ئی ایف سی کے مطابق چیلنج فیشن کے چیف ایگزیکٹو آفیسر چن یان کے مطابق چینی کمپنی پاکستان میں 2014 سے سرمایہ کاری کر رہی ہے اور اس عرصے کے دوران پاکستان سے 300 ملین ڈالر سے زائد مالیت کی ٹیکسٹائل مصنوعات برآمد کی جا چکی ہیں۔ انہوں نے بتایا کہ کمپنی اب پاکستان میں کپڑے اور ملبوسات کی تیاری کے لیے جدید ترین ٹیکنالوجی سے لیس ایک بڑی فیکٹری قائم کرنے جا رہی ہے، جس سے ملک میں ٹیکسٹائل کی پیداواری صلاحیت اور برآمدی استعداد میں نمایاں اضافہ ہوگا۔چن یان کے مطابق منصوبے کے تحت 25 ہزار سے زائد روزگار کے مواقع پیدا کرنے جبکہ سالانہ 400 ملین ڈالر سے زائد کی ٹیکسٹائل برآمدات کا ہدف مقرر کیا گیا ہے۔انہوں نے کہا کہ پاکستان میں ٹیکسٹائل کے شعبے میں وسیع امکانات موجود ہیں اور کمپنی جدید صنعتی ٹیکنالوجی، پیداواری صلاحیت میں اضافے اور برآمدی سرگرمیوں کے ذریعے پاکستان کے ٹیکسٹائل سیکٹر کی ترقی میں اپنا کردار ادا کرے گی۔
بشکریہ: اے پی پی (ایسوسی ایٹڈ پریس آف پاکستان)
