اسلام آباد۔6اکتوبر (اے پی پی):وفاقی وزیر خزانہ و محصولات سینیٹر محمد اورنگزیب نے ڈی آئی خان میں قریشی موڑ، بائی پاس روڈ پر ایف بی آر انفورسمنٹ اسکواڈ کے اہلکاروں پر فائرنگ کے واقعہ کی شدید مذمت کی ہے جس کے نتیجے میں دو اہلکار شہید ہوگئے۔جاری بیان میں وفاقی وزیر نے دورانِ ڈیوٹی شہید ہونے والے آرم گارڈ رحمت اللہ اور سپاہی سلیمان کو خراج عقیدت پیش کیا اور ان کے اہل خانہ سے دلی تعزیت کا اظہار کیا۔
انہوں نے شہداء کے درجات کی بلندی اور لواحقین کے لیے صبر جمیل کی دعا کی۔وفاقی وزیر نے کہا کہ یہ افسوسناک واقعہ ایف بی آر کے پورے ادارے کے لیے گہرے دکھ اور افسوس کا باعث ہے، ہماری ہمدردیاں اور دعائیں شہید اہلکاروں کے خاندانوں کے ساتھ ہیں۔انہوں نے متعلقہ حکام کو واقعے کے تمام پہلوؤں کی تحقیقات اور ضروری کارروائی یقینی بنانے کی ہدایت کرتے ہوئے امید ظاہر کی کہ واقعے میں ملوث عناصر کی شناخت کرکے انہیں قانون کے کٹہرے میں لایا جائے گا۔
سینیٹر محمد اورنگزیب نے انفورسمنٹ ڈیوٹی پر مامور ایف بی آر اہلکاروں کے لیے حکومت کی مکمل حمایت کا اعادہ کرتے ہوئے کہا کہ ایف بی آر اہلکار مشکل اور چیلنجنگ حالات میں اپنی ذمہ داریاں انجام دے رہے ہیں اور ان کی خدمات قابل قدر ہیں۔
بشکریہ: اے پی پی (ایسوسی ایٹڈ پریس آف پاکستان)
