اسلام آباد۔1اکتوبر (اے پی پی):وزیر مملکت خزانہ و محصولات بلال اظہر کیانی نے ایف بی آر افسران کو تاجر نمائندوں کے ساتھ مل کر بازاروں اور ایک ایک دکان کی میپنگ کرنے اور آسان ٹیکس سکیم سے متعلق دکانداروں کو آگاہ کرنے کی ہدایت کی ہے۔ انہوں نے یہ ہدایات دکانداروں کے لئے آسان ٹیکس سکیم پر عمل درآمد کے حوالے سے جائزہ اجلاس کی صدارت کرتے ہوئے دیں۔
اجلاس میں فیصلہ کیاگیا کہ ایف بی آرافسران تاجرنمائندوں کے ساتھ مل کر کل جمعہ سے ملک بھر میں بازاروں اور دکانوں کی میپنگ کا آغاز کریں گے۔ اجلاس کو بتایا گیا کہ تاجروں کی نشاندہی اور شکایت پرٹیکس ریٹرن میں دیگر آمدن کے کالم سے متعلق تکنیکی مسئلہ حل ہو گیا ہے۔ وزیر مملکت نے کہا کہ دکانداروں کو ان کی مرضی کی سکیم دی گئی ہے اورٹیکس ریٹرن جمع نہ کرانے کا اب کوئی جواز نہیں رہا۔
انہوں نے کہا کہ دکانداروں کی مرضی اور مشاورت سے جرمانے رکھے گئے ، دکاندار ٹیکس ریٹرن جمع کرانے کی تاریخ میں 15 دن کی توسیع سے فائدہ اٹھائیں۔ بلال اظہر کیانی نے کہا کہ ٹیکس ریٹرن جمع کرانے کی ڈیڈ لائن گزرنے کے بعد دکاندار پہلے مہینے میں دس ہزار، دوسرے میں 25 اور تیسرے مہینے میں 50 ہزار جرمانہ ادا کرے گا۔
اجلاس میں آسان ٹیکس سکیم پر عمل درآمد اور اب تک کی پیش رفت کا تفصیلی جائزہ لیا گیا ۔ اجلاس میں تاجر رہنمائوں اجمل بلوچ، کاشف چوہدری، حبیب فخرالدین بھی موجود تھے ۔ممبر سٹرٹیجک ٹرانسفارمیشن ڈاکٹر حامد عتیق، ممبر ان لینڈ ریونیو آپریشنز زبیر بلال اور ایف بی آر کے اعلیٰ حکام کے علاوہ ملک بھر کے چیف کمشنرز اور کمشنرز نے ویڈیو لنک کے ذریعے اجلاس میں شرکت کی۔
بشکریہ: اے پی پی (ایسوسی ایٹڈ پریس آف پاکستان)
