اسلام آباد۔1اکتوبر (اے پی پی):پاکستان نیشنل کونسل آف دی آرٹس (پی این سی اے)کے زیر اہتمام ملک کی ممتاز تاثر نگار مصورہ نصرت جی کے منفرد فن پاروں کی نمائش ’’واٹ ریمینز ٹو بی سین‘‘ 13 اکتوبر سے نیشنل آرٹ گیلری اسلام آباد میں شروع ہوگی۔
پی این سی اے حکام کے مطابق نمائش میں مصورہ کے چار دہائیوں سے زائد عرصے پر محیط فنی سفر اور تخلیقی جہتوں کو اجاگر کیا جائے گا۔نمائش میں نصرت جی کے فن کے مختلف پہلوؤں کو منفرد انداز میں پیش کیا جائے گا جن میں ڈرائنگز اور پینٹنگز کے ساتھ روشنی، آواز اور متحرک بصری مناظر کے ذریعے ایسا حسی تجربہ تخلیق کیا گیا ہے جو ناظرین کو یادداشت، ادراک اور منظر کے ظاہری و پوشیدہ پہلوؤں پر غور کرنے کی دعوت دیتا ہے۔
نصرت جی پاکستان کے بصری فنون میں اپنے منفرد پیلیٹ نائف انداز اور گھوڑوں کی دلکش مصوری کے حوالے سے نمایاں شناخت رکھتی ہیں۔ ان کا فن پاکستان کے ثقافتی ورثے، قدرتی مناظر، فنِ تعمیر، روایات اور معاشرتی رنگوں سے گہرا تعلق رکھتا ہے۔مصورہ اب تک 25 سے زائد انفرادی نمائشیں پیش کر چکی ہیں جبکہ برطانیہ، کینیڈا، امریکا، متحدہ عرب امارات، بحرین اور دیگر ممالک میں بھی ان کے فن پارے نمائش کے لیے پیش کیے جا چکے ہیں، ان کی طویل فنی وابستگی اور بین الاقوامی سطح پر شرکت نے پاکستان کے بصری فنون کے فروغ میں نمایاں کردار ادا کیا ہے۔’’واٹ ریمینز ٹو بی سین‘‘ کے عنوان سے منعقد ہونے والی نمائش کو دو حصوں میں تقسیم کیا گیا ہے۔
گیلری ون میں ایک منفرد بصری و حسی تجربہ پیش کیا جائے گا جبکہ گیلری ٹو میں نصرت جی کی ڈرائنگز اور پینٹنگز نمائش کے لیے رکھی جائیں گی۔نمائش کی افتتاحی تقریب 13 اکتوبر کو سہ پہر 3:30 بجے نیشنل آرٹ گیلری پی این سی اے اسلام آباد میں ہوگی ، نمائش 27 اکتوبر تک جاری رہے گی۔پی این سی اے نے فنونِ لطیفہ میں دلچسپی رکھنے والے افراد، طلبہ، فنکاروں اور میڈیا نمائندگان کو نمائش میں شرکت کی دعوت دی ہے۔
بشکریہ: اے پی پی (ایسوسی ایٹڈ پریس آف پاکستان)
