اساتذہ پاکستان کی فکری، سماجی اور معاشی ترقی میں بنیادی کردار ادا کر رہے ہیں، چیئرمین سینیٹ

اسلام آباد۔5اکتوبر (اے پی پی):چیئرمین سینیٹ سید یوسف رضا گیلانی نے عالمی یوم اساتذہ کے موقع پر ملک بھر کے اساتذہ کو خراج تحسین پیش کرتے ہوئے کہا ہے کہ اساتذہ پاکستان کی فکری، سماجی اور معاشی ترقی میں بنیادی کردار ادا کر رہے ہیں۔ ایک پیغام میں انہوں نے کہا کہ اساتذہ صرف علم منتقل نہیں کرتے بلکہ طلبہ میں جستجو، اعتماد اور ذمہ داری کا شعور بھی اجاگر کرتے ہیں، بدلتے ہوئے سماجی اور ٹیکنالوجی کے ماحول میں جدید اور موثر نظام تعلیم ناگزیر ہے۔

انہوں نے کہا کہ تعلیمی نظام میں تخلیقی صلاحیتوں، تنقیدی سوچ، جدت اور ذمہ دارانہ شہریت کو فروغ دینا ضروری ہے جبکہ اساتذہ کو جدید تعلیمی وسائل، مسلسل پیشہ ورانہ تربیت اور سازگار ماحول فراہم کیا جانا چاہیے۔ سید یوسف رضا گیلانی نے کہا کہ اساتذہ نئی نسل کو مستقبل کے مواقع اور چیلنجز کے لیے موثر طور پر تیار کرنے میں کلیدی کردار ادا کرتے ہیں، معیاری تعلیم کا فروغ اور نوجوانوں کے لیے بہتر مواقع پیدا کرنا پارلیمان کے عزم کا حصہ ہے۔ انہوں نے سکولوں، کالجوں اور جامعات میں خدمات انجام دینے والے اساتذہ کی محنت اور خلوص کو سراہتے ہوئے کہا کہ جو معاشرہ علم اور علم بانٹنے والوں کا احترام کرتا ہے، وہ مضبوط اور خوشحال مستقبل کی بنیاد رکھتا ہے۔

بشکریہ: اے پی پی (ایسوسی ایٹڈ پریس آف پاکستان)