پلندری (سدھنوتی)۔1اکتوبر (اے پی پی):آزاد کشمیر کے ضلع سدھنوتی میں قومی یکجہتی، ہم آہنگی اور امن کے فروغ کے لیے عوامی اتحاد فورم کے زیرِ اہتمام امن ریلی کا انعقاد کیا گیا۔ ریلی کوٹلی چوک سے شروع ہوئی جو کچہری چوک پر اختتام پذیر ہوئی۔ ریلی میں سیاسی، سماجی، دینی جماعتوں، تاجر برادری، وکلا اور سول سوسائٹی سمیت تمام مکاتبِ فکر کے شہریوں نے کثیر تعداد میں شرکت کر کے قومی اتحاد کا بھرپور ثبوت دیا۔ریلی کے شرکا نے ہاتھوں میں قومی پرچم اور بینرز اٹھا رکھے تھے اور فضا پاکستان زندہ باد، آزاد کشمیر زندہ باد اور پاک فوج زندہ باد کے فلک شگاف نعروں سے گونجتی رہی۔اس موقع پر مقررین نے خطاب کرتے ہوئے واضح کیا کہ آزاد کشمیر کے غیور عوام ریاست میں بدامنی، انتشار اور ریاستی اداروں کے خلاف کام کرنے والے کسی بھی شرپسند جتھے کی سازش کو کامیاب نہیں ہونے دیں گے۔ انہوں نے امن کے تحفظ اور خطے کی تعمیر و ترقی کے عزم کا اظہار کیا۔ ریلی کے اختتام پر ملک و قوم کی سلامتی، کشمیری شہدا کے درجات کی بلندی اور خطے کے دیرپا استحکام کے لیے خصوصی دعائیں کی گئیں۔
بشکریہ: اے پی پی (ایسوسی ایٹڈ پریس آف پاکستان)
