اسلام آباد۔1اکتوبر (اے پی پی):وفاقی وزیر داخلہ محسن نقوی نے عوامی جمہوریہ چین کے قیام کی 77 ویں سالگرہ کے موقع پراعلیٰ چینی قیادت اور عوام کو دلی مبارکباد پیش کی ہے۔وزارت داخلہ سے جاری بیان کے مطابق اپنے خصوصی پیغام میں وزیر داخلہ نے چین کے صدر شی جن پنگ، وزیر اعظم اور اپنے ہم منصب کے لیے نیک خواہشات کا اظہار کرتے ہوئے کہا کہ آج کا دن چینی قوم کی ثابت قدمی اور غیر معمولی جذبے کو خراجِ تحسین پیش کرنے کا دن ہے۔محسن نقوی نے کہا کہ صدر شی جن پنگ کی بصیرت افروز قیادت میں چین نے انسانی ترقی، سائنس اور ٹیکنالوجی کے میدان میں بے مثال کامیابیاں سمیٹی ہیں، اس کی معاشی، سماجی اور عسکری میدان میں غیر معمولی ترقی نہ صرف قابلِ رشک ہے بلکہ خطے کے امن، استحکام اور خوشحالی کا اہم ذریعہ بھی ہے۔انہوں نے پاک چین تعلقات پر روشنی ڈالتے ہوئے کہا کہ دونوں ممالک ہر موسم کے بااعتماد شراکت دار ہیں اور ان کی باہمی دوستی وقت کے ہر کڑے امتحان پر پوری اتری ہے۔ان کا کہنا تھا کہ ہمالیہ کی فلک بوس چوٹیاں، سمندر کی گہرائیاں اور قراقرم کی سنگلاخ راہیں اس لازوال رشتے کی گواہ ہیں، چین نے ہر بحران، علاقائی کشیدگی اور داخلی چیلنج میں پاکستان کا بھرپور ساتھ دیا ۔ وزیر داخلہ نے قومی دن کے پرمسرت موقع پر چینی قوم کی انتھک محنت، بے مثال جدت پسندی اور ولولہ انگیز عزم کو خراجِ تحسین پیش کیا
بشکریہ: اے پی پی (ایسوسی ایٹڈ پریس آف پاکستان)
