اسلام آباد۔1اکتوبر (اے پی پی):ہائر ایجوکیشن کمیشن (ایچ ای سی) نے پاکستانی اور آزاد جموں و کشمیر کے تسلیم شدہ اعلیٰ تعلیمی اداروں میں زیر تعلیم کل وقتی پی ایچ ڈی سکالرز کے لئے چھ ماہ کی تحقیقی فیلوشپ کا اعلان کردیا۔ ایچ ای سی کے انٹرنیشنل ریسرچ سپورٹ انیشی ایٹو پروگرام کے بیچ 60 کے تحت فراہم کی جانے والی اس فیلوشپ کا مقصد پی ایچ ڈی سکالرز کی تحقیقی صلاحیتوں کو مضبوط بنانا اور پاکستانی و غیر ملکی تعلیمی اداروں اور محققین کے درمیان روابط کو فروغ دینا ہے۔
ایچ ای سی کے مطابق درخواست گزار پاکستانی یا آزاد جموں و کشمیر کا شہری اور کسی تسلیم شدہ پاکستانی یونیورسٹی میں کل وقتی پی ایچ ڈی پروگرام میں داخلہ رکھتا ہو۔ امیدوار کے لئے کم از کم 18 پی ایچ ڈی کریڈٹ آورز مکمل کرنا اور پی ایچ ڈی میں 18 ماہ سے ساڑھے تین سال تک کا اندراج ہونا ضروری ہے۔ بیچ 60 کے لئے داخلہ بہار 2023 سے بہار 2025 کے دوران ہونا چاہئے۔
امیدوار کے لئے پی ایچ ڈی داخلے کے وقت جی اے ٹی سبجیکٹ ٹیسٹ یا یونیورسٹی داخلہ ٹیسٹ پاس کرنا، متعلقہ ادارے سے تحقیقی موضوع اور خلاصے کی منظوری حاصل کرنا اور کسی غیر ملکی یونیورسٹی یا تحقیقی ادارے کا باضابطہ قبولیتی یا دعوت نامہ پیش کرنا بھی لازمی ہے۔ غیر ملکی میزبان ادارہ ترقی یافتہ ملک میں واقع ہو اور ٹائمز ہائر ایجوکیشن یا کیو ایس عالمی یونیورسٹی درجہ بندی میں مجموعی طور پر یا متعلقہ مضمون کے لحاظ سے نمایاں درجہ رکھتا ہو۔
غیر ملکی نگران امیدوار کے مقامی پی ایچ ڈی نگران کا سابقہ نگران نہیں ہونا چاہئے اور وہ کم از کم اسسٹنٹ پروفیسر کے عہدے پر کل وقتی فیکلٹی رکن ہو۔ ایچ ای سی نے درخواستیں جمع کرانے کی آخری تاریخ 30 اکتوبر 2026 مقرر کی ہے۔ درخواستیں صرف ایچ ای سی کے آن لائن پورٹل کے ذریعے جمع کرائی جا سکیں گی جبکہ ناقابل واپسی درخواست فیس 3 ہزار روپے مقرر کی گئی ہے۔
بشکریہ: اے پی پی (ایسوسی ایٹڈ پریس آف پاکستان)
