ڈیرہ غازی خان ۔ 06 اکتوبر (اے پی پی):بورڈ آف انٹرمیڈیٹ اینڈ سیکنڈری ایجوکیشن ڈیرہ غازی خان کے بورڈ آف گورنرز کا 177واں اجلاس چیئرمین تعلیمی بورڈ پروفیسر ڈاکٹر عبدالرؤف کی زیر صدارت منعقد ہوا۔اجلاس میں بورڈ آف گورنرز کے اراکین سمیت محکمہ ہائر ایجوکیشن اور محکمہ خزانہ کے نمائندگان نے بذریعہ ویڈیو لنک شرکت کی۔تفصیلات کے مطابق اجلاس کے آغاز پر سیکرٹری تعلیمی بورڈ عبدالرحمن چوہدری نے شرکاء کو ایجنڈے، انتظامی امور اور مختلف مالی معاملات پر تفصیلی بریفنگ دی۔اس موقع پر پنجاب پبلک سروس کمیشن کے ذریعے تعینات ملازمین کی تین سالہ توسیع، فیملی پنشن سے متعلق امور اور ادارے میں نظم و ضبط برقرار رکھنے سمیت مختلف اہم معاملات پر غور کیا گیا۔اس کے علاوہ بورڈ آف گورنرز نے پوزیشن ہولڈرز کے کیش ایوارڈز میں نمایاں اضافے کی منظوری دے دی۔
فیصلے کے مطابق پہلی، دوسری اور تیسری پوزیشن حاصل کرنے والے طلبہ کے کیش ایوارڈز بالترتیب 10 ہزار، 15 ہزار اور 20 ہزار روپے سے بڑھا کر ایک لاکھ، ایک لاکھ 25 ہزار اور ایک لاکھ 50 ہزار روپے کر دیے گئے ہیں۔اجلاس میں ادارے میں نظم و ضبط برقرار رکھنے اور سزا و جزا کے معاملات کو مؤثر انداز میں دیکھنے کے لیے خصوصی کمیٹی کے قیام کی بھی منظوری دی گئی۔اس موقع پر چیئرمین تعلیمی بورڈ پروفیسر ڈاکٹر عبدالرؤف نے کہا کہ تعلیمی بورڈ کے انتظامی امور میں بہتری، ملازمین کے جائز مسائل کے حل اور طلبہ کی حوصلہ افزائی کے لیے مؤثر اقدامات کا سلسلہ جاری ہے۔ انہوں نے کہا کہ طلبہ کی محنت اور تعلیمی کارکردگی کو سراہنا اور انہیں مزید آگے بڑھنے کے مواقع فراہم کرنا بورڈ کی ترجیحات میں شامل ہے۔
بشکریہ: اے پی پی (ایسوسی ایٹڈ پریس آف پاکستان)
