ملتان ۔ 07 اکتوبر (اے پی پی):ڈپٹی کمشنر ملتان ڈاکٹر محمد فیصل سلیم کی ہدایت پر تاریخی حسین آگاہی بازار کی اپ گریڈیشن کا منصوبہ تیزی سے جاری ہےجس کا مقصد شہریوں کو خوبصورت ماحول، بہتر سہولیات اور معیاری شہری انفراسٹرکچر فراہم کرنا ہے۔ منصوبے کی بروقت تکمیل کے لیے تعمیراتی سرگرمیوں کو دن رات جاری رکھا جا رہا ہے۔انہوں نے موقع پر سول ورک کی پیشرفت، تعمیراتی سرگرمیوں اور دیگر ترقیاتی کاموں کا معائنہ کیا جبکہ متعلقہ حکام نے منصوبے پر ہونے والی پیشرفت کے حوالے سے بریفنگ دی۔
اس موقع پر ڈپٹی کمشنر نے متعلقہ افسران کو ہدایت کی کہ حسین آگاہی بازار کی اپ گریڈیشن کے کام میں مزید تیزی لائی جائے اور تمام ترقیاتی کام مقررہ مدت میں اعلیٰ معیار کے ساتھ مکمل کیے جائیں۔ انہوں نے کہا کہ تعمیراتی کام کے دوران شہریوں کو کم سے کم مشکلات کا سامنا ہونا چاہیے اور عوامی آمدورفت کو ممکنہ حد تک بہتر رکھا جائے۔ ڈاکٹر محمد فیصل سلیم نے کہا کہ شہریوں کی مشکلات اور سہولیات کو مدنظر رکھتے ہوئے منصوبے پر دن رات کام جاری ہے تاکہ اسے جلد مکمل کرکے شہریوں کو بہتر سہولیات فراہم کی جاسکیں۔
انہوں نے کہا کہ حسین آگاہی بازار ملتان کی تاریخی شناخت کا اہم حصہ ہے، اس کی خوبصورتی اور شہری سہولیات میں بہتری کے لیے تمام متعلقہ ادارے مربوط انداز میں کام کر رہے ہیں۔
بشکریہ: اے پی پی (ایسوسی ایٹڈ پریس آف پاکستان)
