لاہور ۔2اکتوبر (اے پی پی):بنگلہ دیش نے فیصل آباد میں کھیلی جانے والی انڈر 19 ویمنز ٹی ٹوئنٹی ٹرائی نیشن سیریز کے افتتاحی میچ میں میزبان پاکستان کو 30 رنز سے شکست دے کر فاتحانہ آغاز کردیا۔اقبال سٹیڈیم فیصل آباد میں جمعہ کو کھیلے گئے میچ میں بنگلہ دیش نے ٹاس جیت کر پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 117 رنز بنائے۔ سعدیہ اختر نے 34 رنز کی ناقابل شکست اننگز کھیلی، جبکہ نشیتا اختر نیشی نے 23 رنز بنائے۔
پاکستان کی جانب سے مہنور زیب نے 24 رنز کے عوض 3 وکٹیں حاصل کیں، روزینہ اکرم نے 2 جبکہ شاہربانو اور مقامی لیفٹ آرم سپنر ماہَم نازکات نے ایک، ایک کھلاڑی کو آؤٹ کیا۔ہدف کے تعاقب میں پاکستان کی ٹیم مقررہ 20 اوورز میں 6 وکٹوں کے نقصان پر 87 رنز بنا سکی۔ کومل خان 29 رنز کے ساتھ نمایاں رہیں۔انہوں نے 39 گیندوں کا سامنا کرتے ہوئے 3 چوکے لگائے۔ رَوائل فرحان نے 12 گیندوں پر 17 رنز بنائے اور 4 چوکے لگائے۔
بنگلہ دیش کی جانب سے پلیئر آف دی میچ نشیتا اختر نیشی نے آل راؤنڈ کارکردگی کا مظاہرہ کیا۔ انہوں نے پہلے بیٹنگ میں 23 رنز بنانے کے بعد 4 اوورز میں 16 رنز دے کر 2 وکٹیں حاصل کیں۔ انہوں نے زوفیشان ایاز اور اقصیٰ حبیب کو آؤٹ کیا۔بنگلہ دیشی بولرز نے عمدہ دباؤ برقرار رکھتے ہوئے پاکستان کی پانچ وکٹیں 37 رنز پر حاصل کرلیں۔ پاکستان کی جانب سے ڈیبیو کرنے والی پاکیزہ شبیر صرف 6 رنز بنا سکیں، جبکہ شہربانو 18 گیندوں پر ایک بھی باؤنڈری نہ لگا سکیں۔
بنگلہ دیش کی جانب سے نشیتا اختر نیشی اور افرین میم نے 2،2 جبکہ فرجانہ اعظیم میدھا اور ادریتہ نوشین نے ایک، ایک وکٹ حاصل کی۔ بنگلہ دیش کے تمام چھ بولرز نے فی اوور 6 سے کم رنز دیے۔یہ میچ اقبال سٹیڈیم فیصل آباد میں پہلی مرتبہ کسی بین الاقوامی ویمنز میچ کی میزبانی کے حوالے سے بھی اہم رہا۔سیریز کے دوسرے میچ میں پاکستان ہفتہ کو سری لنکا کے خلاف میدان میں اترے گا، میچ کی پہلی گیند صبح 11 بجے اقبال سٹیڈیم فیصل آباد میں کرائی جائے گی۔
بشکریہ: اے پی پی (ایسوسی ایٹڈ پریس آف پاکستان)
