اسلام آباد۔2اکتوبر (اے پی پی):خصوصی سرمایہ کاری سہولت کونسل (ایس آئی ایف سی) نے صحت اور ادویات کے شعبوں میں جاری اہم اصلاحات اور ترقیاتی اقدامات پر پیش رفت کا تفصیلی جائزہ لیا۔ اجلاس کی مشترکہ صدارت وفاقی وزیر صحت اور ڈائریکٹر جنرل ایس آئی ایف سی نے کی جس میں وزارت قومی صحت، ڈرگ ریگولیٹری اتھارٹی، ڈیفنس سائنس اینڈ ٹیکنالوجی آرگنائزیشن، پاکستان نرسنگ اینڈ مڈوائفری کونسل، قومی ادارہ صحت اور وزارت تجارت کے اعلیٰ حکام نے شرکت کی۔
اجلاس میں صحت کے شعبے میں مقامی ویکسین کی تیاری، پلازما فریکشنیشن منصوبے، قومی پالیسیوں کے پیکیج کی تشکیل، ادویات کے ٹریک اینڈ ٹریس نظام کے نفاذ اور صحت و ادویات کے شعبے کی برآمدی صلاحیت بڑھانے سے متعلق اقدامات کا جائزہ لیا گیا۔مقامی پیداواری صلاحیت میں اضافے، درآمدی انحصار میں کمی، جدید ٹیکنالوجی کے فروغ اور شعبے میں سرمایہ کاری کے نئے مواقع پیدا کرنے کے لیے مختلف اقدامات پر غور کیا گیا۔ اجلاس میں متعلقہ اداروں کے درمیان مربوط اقدامات کے ذریعے جاری منصوبوں پر موثر عملدرآمد کی اہمیت پر بھی زور دیا گیا۔
ایس آئی ایف سی نے اس امر پر زور دیا کہ نشاندہی کردہ مواقع اور اصلاحاتی اقدامات کو عملی نتائج میں تبدیل کرنے کے لیے ادارہ جاتی رابطہ کاری کو مزید موثر بنایا جائے تاکہ صحت اور ادویات کے شعبے میں مقامی تیاری، قدر میں اضافے، سرمایہ کاری اور برآمدات کو فروغ دیا جا سکے۔ایس آئی ایف سی کے مربوط سہولت کاری کے نظام کے تحت صحت اور ادویات کے شعبے میں ترجیحی اقدامات کو آگے بڑھانے، ملکی پیداواری صلاحیت مستحکم کرنے اور عالمی منڈی میں پاکستانی مصنوعات کی مسابقتی صلاحیت بہتر بنانے کے لیے مربوط کوششیں جاری ہیں۔
بشکریہ: اے پی پی (ایسوسی ایٹڈ پریس آف پاکستان)
