سرگودھا -04 اکتوبر (اے پی پی):اینٹی کرپشن سرگودھا نےمحکمہ جنگلات کے فارسٹ رینجر کورشوت لیتےہوئےرنگےہاتھوں گرفتار کر لیا۔ اینٹی کرپشن سرگودھا نے کارروائی کرتے ہوئے محکمہ جنگلات خوشاب رینج کے فارسٹ رینجر کو مبینہ طور پر رشوت لیتے ہوئے رنگے ہاتھوں گرفتار کر لیا۔اینٹی کرپشن ذرائع کے مطابق حکومت پنجاب کی کرپشن کے خلاف زیرو ٹالرینس پالیسی کے تحت اینٹی کرپشن سرگودھا کی جانب سے کرپٹ عناصر کے خلاف کارروائیاں جاری ہیں۔
اسی سلسلے میں ریجنل ڈائریکٹر اینٹی کرپشن سرگودھا کی سربراہی میں اینٹی کرپشن خوشاب نے کارروائی کرتے ہوئے محکمہ جنگلات کے فارسٹ رینجر جاویدعلی کو گرفتار کیا۔ اینٹی کرپشن حکام کے مطابق ملزم جاوید علی نے سرکاری نرسری سےپودے دلوانے اور سرکاری جنگل سے لکڑی کٹوانے کے عوض 10 ہزار روپے رشوت طلب کی تھی۔ کارروائی کے دوران ملزم کو مبینہ طور پر رشوت کی رقم وصول کرتے ہوئےرنگے ہاتھوں گرفتار کیا گیا۔ اینٹی کرپشن خوشاب نے ملزم کے خلاف مقدمہ درج کر کے مزید تفتیش شروع کر دی ہے۔ حکام کے مطابق کرپشن کے خلاف کارروائیاں بلاامتیاز جاری رہیں گی۔
بشکریہ: اے پی پی (ایسوسی ایٹڈ پریس آف پاکستان)
