کوئٹہ۔ 03 اکتوبر (اے پی پی):محکمہ ٹرانسپورٹ بلوچستان کا ماہانہ جائزہ اجلاس سیکرٹری ٹرانسپورٹ بلوچستان حیات کاکڑ کی زیرِ صدارت سول سیکرٹریٹ کوئٹہ میں منعقد ہوا۔اجلاس میں ایڈیشنل سیکرٹری ٹرانسپورٹ قربان علی مگسی، منیجنگ ڈائریکٹر ماس ٹرانزٹ اتھارٹی عبدالخالق زہری، سیکرٹری پروونشل ٹرانسپورٹ اتھارٹی (پی ٹی اے ) عبدالمجید جونیجو، ڈپٹی ڈائریکٹر بلوچستان ٹریفک انجینئرنگ بیوروشکیل احمد، ڈائریکٹراحسان اللہ اور سیکرٹری ریجنل ٹرانسپورٹ اتھارٹی کوئٹہ نعمت اللہ ترین نے شرکت کی۔
اجلاس میں محکمہ ٹرانسپورٹ کے ترقیاتی منصوبوں پر پیش رفت، محکمانہ ڈیٹا بیس کی دیکھ بھال، خالی آسامیوں کے خلاف بھرتیوں اور ترقیوں، اسائنمنٹ اکاؤنٹ، ٹینڈرنگ کے عمل اور منصوبوں پر عملدرآمد کا تفصیلی جائزہ لیا گیا۔اجلاس کے دوران اے آئی اپائنٹمنٹ پالیسی پر عملدرآمد، زیرِ سماعت عدالتی مقدمات کی صورتحال اور صوبائی ایکشن پلان پر بھی غور کیا گیا۔
اس کے علاوہ مالی سال 2026-27 کے لیےپی ٹی اے اور آر ٹی اے کوئٹہ کی جانب سے مقررہ اہداف کے مقابلے میں ریونیو وصولی کی پیش رفت کا بھی جائزہ لیا گیا۔صوبائی سیکرٹری ٹرانسپورٹ حیات کاکڑ نے متعلقہ افسران کو ہدایت کی کہ اجلاس میں زیرِ بحث امور پر پیش رفت کو یقینی بنایا جائے اور تمام متعلقہ ادارے اپنے اپنے شعبوں میں جاری کاموں کی بروقت تکمیل اور تازہ ترین پیش رفت سے محکمہ کو آگاہ رکھیں۔اجلاس میں محکمہ ٹرانسپورٹ سے متعلق دیگر اہم امور بھی زیرِ غور آئے اور متعلقہ افسران نے اپنے اپنے شعبوں کے حوالے سے بریفنگ دی۔
بشکریہ: اے پی پی (ایسوسی ایٹڈ پریس آف پاکستان)
