فیصل آباد۔ 02 اکتوبر (اے پی پی):زرعی یونیورسٹی فیصل آباد کے کلیہ ویٹرنری سائنسز میں عالمی یومِ حیوانات کے موقع پر آگاہی واک اور تعلیمی سرگرمیوں کا انعقاد کیا گیا، جس کا مقصد جانوروں کی فلاح و بہبود، ذمہ دارانہ دیکھ بھال اور جانوروں کی صحت کی اہمیت کے حوالے سے عوامی شعور اجاگر کرنا تھا۔ ڈین کلیہ ویٹرنری سائنسز ڈاکٹر شاہد محمود نے کہا کہ ہمیں جانوروں کی تمام اقسام اور انسانوں کے ساتھ ان کے تعلق کو اہمیت دیتے ہوئے ان کی زندگی کا جشن منانا چاہیے۔ انہوں نے کہا کہ جانور ماحولیاتی نظام میں نہایت اہم کردار ادا کرتے ہیں اور انسانوں کو فطرت سے قریب لانے کا ذریعہ بھی ہیں۔ انہوں نے مزید کہا کہ موسمیاتی تبدیلیوں، عالمی آبادی میں تیزی سے اضافے کے باعث دنیا بھر میں جانوروں کی بقا کو سنگین خطرات لاحق ہیں۔ شعبہ پیتھالوجی کے چیئرمین پروفیسر ڈاکٹر کاشف سلیمی نے کہا کہ ویٹرنری ماہرین کی ذمہ داری محض جانوروں کے علاج تک محدود نہیں بلکہ بیماریوں کی روک تھام، خوراک کے تحفظ اور جانوروں کے ساتھ ہمدردانہ رویوں کے فروغ میں بھی ان کا اہم کردار ہے۔
انہوں نے جانوروں کی فلاح و بہبود کو بہتر بنانے کے لیے عوامی آگاہی اور جانور پالنے کے حوالے سے ذمہ دارانہ طرزِ عمل اپنانے کی ضرورت پر زور دیا۔ پروفیسر ڈاکٹر راؤ زاہد عباس نے کہا کہ ویٹرنری تعلیم اور تحقیق طلبہ اور معاشرے میں جانوروں کی ذمہ دارانہ دیکھ بھال کے حوالے سے شعور اجاگر کرنے میں اہم کردار ادا کرتی ہیں۔ اس موقع پر ڈاکٹر اسلم، ڈاکٹر سلطان علی، ڈاکٹر عائشہ خاتون، ڈاکٹر مصباح اعجاز، ڈاکٹر رضیہ سلطان اور دیگر مقررین نے بھی خطاب کیا۔ آگاہی واک میں فیکلٹی ممبران اور طلبہ نے شرکت کی۔ شرکا نے جانوروں کی فلاح و بہبود، ان کے ساتھ ہمدردانہ سلوک اور جانوروں کی صحت کے تحفظ میں ویٹرنری ماہرین کے کردار کو اجاگر کرنے والے پیغامات پر مبنی پلے کارڈز اٹھا رکھے تھے۔
بشکریہ: اے پی پی (ایسوسی ایٹڈ پریس آف پاکستان)
