فیصل آباد۔ 02 اکتوبر (اے پی پی):اقبال سٹیڈیم فیصل آباد میں انڈر 19 ویمن ٹی 20 ٹرائی سیریز میں بنگلہ دیش نے فاتحانہ آغازکرتے ہوئے میزبان پاکستان کو 30 رنز سے شکست دیدی ہے۔ فیصل آباد میں پہلی بار کسی ویمن انٹرنیشنل میچ کی میزبانی کی گئی، جہاں بنگلہ دیش نے پہلے بیٹنگ کرتے ہوئے مقررہ 20 اوورز میں 8 وکٹوں پر 117 رنز بنائے۔ جواب میں پاکستان ٹیم 20 اوورز میں 6 وکٹوں پر 87 رنز ہی بنا سکی۔۔بنگلہ دیش کی نشیطہ اختر نشی نے شاندار آل راؤنڈ کارکردگی دکھائی۔ انہوں نے پہلے 33 گیندوں پر 23 رنز بنائے اور بعد میں 4 اوورز میں صرف 16 رنز دے کر 2 اہم وکٹیں حاصل کیں۔ بنگلہ دیش کی ویمن ٹیم نے ٹاس جیت کر پہلے بیٹنگ کا فیصلہ کرنے والی بنگلہ دیش ٹیم کے 47 رنز پر 4 کھلاڑی 9.4 اوورز میں آؤٹ ہو گئے تھے۔ اس موقع پر سعدیہ اختر نے 25 گیندوں پر ناٹ آؤٹ 34 رنز کی میچ وننگ اننگز کھیلی جس میں ایک چوکا اور دو چھکے شامل تھے۔پاکستان کی جانب سے لیفٹ آرم پیسر ماہ نور زیب نے 24 رنز دے کر 3 وکٹیں حاصل کیں، روزینہ اکرم نے 2، شہر بانو اور مقامی لیفٹ آرم سپنر ماہم نزاکت نے ایک ایک وکٹ لی۔
پاکستان کی بیٹنگ ہدف حاصل کرنے میں ناکام رہی 118 رنز کے ہدف کے تعاقب میں پاکستان کی کومل خان نے 39 گیندوں پر 3 چوکوں کی مدد سے 29 رنز بنا کر ٹاپ سکورر رہیں۔ اوپنر رویل فرحان نے جارحانہ آغاز کیا اور 12 گیندوں پر 4 چوکوں کے ساتھ 17 رنز بنائے لیکن لیفٹ آرم سپنر آفرین مِم کی گیند پر ایل بی ڈبلیو ہو گئیں۔کومل اور رویل کے درمیان 21 رنز کی شراکت کے بعد پاکستان کی بیٹنگ لڑکھڑا گئی اور 37 رنز کے اندر 5 وکٹیں گر گئیں۔ زوفیشان ایاز 12، اقصیٰ حبیب 9، ڈیبیو کرنے والی پاکیزہ شبیر 6 اور شہر بانو 18 گیندوں پر بغیر کسی باؤنڈری کے آؤٹ ہوئیں۔بنگلہ دیش کی جانب سے نشیطہ کے علاوہ آفرین مِم نے 2، فرجانہ ایسمیں مدھا اور اوڈریتا نوشین نے ایک ایک وکٹ حاصل کی۔ تمام 6 بولرز نے 6 سے کم اوسط سے رنز دیے۔پاکستان اپنا اگلا میچ کل 3 اکتوبر کو سری لنکا کے خلاف اسی گراؤنڈ میں صبح 11 بجے کھیلے گی۔
بشکریہ: اے پی پی (ایسوسی ایٹڈ پریس آف پاکستان)
