سرگودھا ۔ 06 اکتوبر (اے پی پی):اینٹی کرپشن سرگودھا نے کارروائی کرتے ہوئے اسسٹنٹ کمشنر آفس سرگودھا کے اہلکار کو رشوت لیتے ہوئے گرفتار کر لیا۔ اینٹی کرپشن ذرائع کے مطابق اینٹی کرپشن سرگودھا نے ریجنل ڈائریکٹر اینٹی کرپشن سرگودھا کی سربراہی میں کرپشن کے خلاف کارروائیاں جاری رکھی ہوئی ہیں۔
حکام کے مطابق حکومت پنجاب کی زیرو ٹالر ینس پالیسی کے تحت کرپٹ عناصر کے خلاف کارروائیوں کا سلسلہ جاری ہے۔ ملزم محمد عرفان اہلکار دفتر اسسٹنٹ کمشنر سرگودھا نے ایک شہری کی اسسٹنٹ کمشنر سرگودھا آفس سے درخواست تحصیلدار کو مارک کروانے کے عوض مبلغ 4 ہزار روپے رشوت طلب کی۔ شکایت موصول ہونے پر اینٹی کرپشن سرگودھا کی ٹیم نے کارروائی کرتے ہوئے ملزم محمد عرفان کو رشوت کی رقم وصول کرتے ہوئے رنگے ہاتھوں گرفتار کر لیا۔
اینٹی کرپشن سرگودھا نے ملزم کے خلاف مقدمہ درج کر کے مزید تفتیش شروع کر دی ہے۔ حکام کا کہنا ہے کہ سرکاری امور کی انجام دہی میں رشوت ستانی اور بدعنوانی کے خلاف کاروائیاں قانون کے مطابق جاری رہیں گی۔
بشکریہ: اے پی پی (ایسوسی ایٹڈ پریس آف پاکستان)
