لاہور۔1اکتوبر (اے پی پی):پاکستان نے ایشین گیمز مینز کرکٹ مقابلے کے پہلے سیمی فائنل میں بنگلہ دیش کو 6 وکٹوں سے شکست دیکر گولڈ میڈل میچ کیلئے کوالیفائی کر لیا۔پاکستان کا فائنل میں مقابلہ ہفتہ کے روز بھارت سے ہوگا جبکہ تیسری پوزیشن کیلئے بنگلہ دیش سری لنکا کے مابین میچ بھی ہفتہ کو ہوگا۔
بارش اور گیلی آٹ فیلڈ کے باعث میچ 13،13 اوورز تک محدود کر دیا گیا تھا۔بنگلہ دیش نے پہلے بیٹنگ کرتے ہوئے7 وکٹوں کے نقصان پر 111 رنز بنائے،جواب میں پاکستان نے ہدف 11.3 اوورز میں4 وکٹوں کے نقصان پر حاصل کر لیا۔پاکستان کی کامیابی میں عبدالصمد نے جارحانہ بیٹنگ کے ذریعے اہم کردار ادا کیا۔ انہوں نے صرف15 گیندوں پر ناقابل شکست 30 رنز بنائے،جس میں5 چوکے اور ایک چھکا شامل تھا۔حسن نواز22 گیندوں پر27 رنز بنا کر ناٹ آوٹ رہے۔دونوں نے پانچویں وکٹ کی ناقابل شکست شراکت میں59 رنز جوڑ کر پاکستان کو 9 گیندیں قبل ہی فتح دلا دی۔ہدف کے تعاقب میں پاکستان کا آغاز زیادہ اچھا نہ تھا۔
کپتان صاحبزادہ فرحان ایک رن بنا کر آوٹ ہوئے،جبکہ معاز صداقت نے چھکے اور چوکے سے تیز آغاز کیا لیکن جلد ہی وکٹ گنوا بیٹھے۔صائم ایوب نے بھی مختصر اننگز میں دو چھکے لگائے۔عثمان خان کو رِشاد حسین نے آوٹ کیا،جس کے بعد عبدالصمد اور حسن نواز نے ذمہ داری سنبھالی اور میچ پاکستان کے حق میں ختم کر دیا۔اس سے قبل بنگلہ دیش نے بیٹنگ کرتے ہوئے ابتدائی اوورز میں وکٹیں گنوائیں۔تنزید حسن، لٹن داس اور پرویز حسین ایمن بڑی اننگز نہ کھیل سکے، تاہم توحید ہردوئے نے42 رنز کی جارحانہ اننگز کھیل کر ٹیم کو قابلِ دفاع مجموعے تک پہنچانے کی کوشش کی۔
ہردوئے نے مشکل مرحلے میں موسادک حسین کے ساتھ پانچویں وکٹ کیلئے53 رنز کی شراکت قائم کی۔پاکستان کی جانب سے صفیان مقیم نے 3 وکٹیں حاصل کیں جبکہ عرفات منہاس نے 2 کھلاڑیوں کو آوٹ کیا۔بنگلہ دیش کی جانب سے رِشاد حسین نے ایک وکٹ حاصل کی۔پاکستان نے112 رنز کا ہدف 11.3 اوورز میں4 وکٹوں کے نقصان پر حاصل کرکے ایشین گیمز کے گولڈ میڈل میچ میں جگہ بنا لی۔
بشکریہ: اے پی پی (ایسوسی ایٹڈ پریس آف پاکستان)
