پاکستان سٹاک ایکسچینج میں رجسٹرڈ کمپنیوں کے منافع میں گزشتہ مالی سال کے دوران سالانہ بنیادوں پر نمایاں اضافہ

اسلام آباد۔5اکتوبر (اے پی پی):پاکستان سٹاک ایکسچینج میں رجسٹرڈ کمپنیوں کے منافع میں گزشتہ مالی سال کے دوران سالانہ بنیادوں پر نمایاں اضافہ ریکارڈکیاگیاہے۔پاکستان سٹاک ایکسچینج اور ٹاپ لائن سکیورٹیز کے اعداد و شمار کے مطابق مالی سال 2026 کے دوران کے ایس ای 100 انڈیکس کے تحت رجسٹرڈ کمپنیوں کا مجموعی منافع 2.03 ٹریلین روپے ریکارڈ کیا گیا جو مالی سال 2025 کے 1.70 ٹریلین روپے کے مقابلے میں تقریباً 18فیصد زیادہ ہے۔

اعداد و شمار کے مطابق بینکوں اور ایکسپلوریشن و پروڈکشن کمپنیوں کے منافع میں نمایاں اضافہ مجموعی کارپوریٹ منافع میں اضافے کا اہم سبب بنا۔ مالی سال 2026 کے دوران بینکوں کا مجموعی منافع 649 ارب روپے جبکہ تیل و گیس کی تلاش و پیداوار کرنے والی کمپنیوں کا منافع 461 ارب روپے ریکارڈ کیا گیا۔رپورٹ کے مطابق مالی سال 2026 کے دوران بینکوں اور ایکسپلوریشن و پروڈکشن کمپنیوں کے منافع میں تقریبا 32 فیصد اضافہ ہوا جس کے نتیجے میں کے ایس ای 100 انڈیکس میں شامل کمپنیوں کے مجموعی منافع پر مثبت اثرات مرتب ہوئے۔

اعداد و شمار کے مطابق مالی سال 2024 کے دوران کے ایس ای 100 انڈیکس کے تحت رجسٹرڈ کمپنیوں کا مجموعی منافع 1.55 ٹریلین روپے، مالی سال 2023 میں 1.23 ٹریلین روپے جبکہ مالی سال 2022 میں 979 ارب روپے ریکارڈ کیا گیا تھا،یوں گزشتہ پانچ مالی سال کے دوران کے ایس ای 100 انڈیکس میں شامل کمپنیوں کے مجموعی منافع میں مسلسل اضافہ دیکھا گیا ہے اور مالی سال 2026 میں یہ حجم پہلی مرتبہ 2 ٹریلین روپے کی سطح سے تجاوز کر گیا۔

بشکریہ: اے پی پی (ایسوسی ایٹڈ پریس آف پاکستان)